Stjórn Foreldrafélags Austurbæjarskóla óskar eftir því að lagfæringum og endurbótum á skólalóðinni verði ekki frestað heldur staðið við upprunalegt loforð borgarinnar. Aðgengið sé einnig of auðvelt um skólann.
Í bréfi Foreldrafélagsins kemur einnig fram að stígur liggi í gegnum skólalóðina og þar gangi túristar gjarnan á leið sinni að Hallgrímskirkju eða Sundhöll Reykjavíkur og í sumum tilfellum álpist þeir jafnvel inn í skólann. Það er Eiríkur Jónsson sem bendir á þessa frétt.
Bréfið má lesa hér að neðan:
Lóð Austurbæjarskóla er ein elsta skólalóð borgarinnar. Hún er leiksvæði barna á öllum aldri á skólatíma og eftir að skóla lýkur og því afar mikilvæg lýðheilsu barna í hverfinu. Mikil þörf er á viðhaldi og gagngerum endurbótum á lóðinni sem er farin að láta verulega á sjá.
Miðborgin sker sig úr öðrum hverfum borgarinnar þar sem hún tekur á móti miklum fjölda
ferðafólks. Leið þeirra liggur gjarnan í gegnum lóðina enda er Sundhöllin til móts við skólann vinsæll áfangastaður og Hallgrímskirkja við hlið skólans. Í gegnum lóðina liggur stígur sem oft er notaður af ferðafólki sem jafnvel álpast inn í skólann. Það er mikilvægt að loka þessari leið og minnka umgengni óviðkomandi á lóðinni.
Niðurstöður skólaþings sem fram fór í Austurbæjarskóla á síðasta skólamisseri sýna að
nemendur í Austurbæjarskóla telja aðgengi inn í skólann of auðvelt, hver sem er geti gengið inn á lóðina og margir upplifa óöryggi í því samhengi. Ljóst er að þetta er frábrugðið því sem gerist og gengur hjá öðrum skólum á höfuðborgarsvæðinu. Einnig er öryggi víða ábótavant á lóðinni og mikilvægt að taka á því.
Athugasemdir