Töluverðar líkur eru á að forsprakkar Facebook og Twitter, Mark Zuckerberg og Elon Musk, muni etja kappi í blönduðum bardagalistum á næstu misserum.
Samkvæmt TMZ mun embættismaður tengdur ríkisstjórn Ítalíu hafa sett sig í samband við Zuckerberg og lagt til að bardaginn milli þeirra Musk færi fram í frægasta bardagastað veraldar, Colosseum í Róm.
Menningarmálaráðuneyti Ítalíu blæs á þessar fréttir og segja að það hafi hvorki verið formleg- né skrifleg samskipti vegna þessa og ef félagarnir vildu mætast í Colosseum þyrfti rimman að vera án ofbeldis en TMZ fullyrðir að heimildarmenn þeirra sem hafi beina aðkomu að málinu hafi vitneskju um að ráðuneytið hafi haft samband við fólk Zuckerbergs sem svo kom málinu áfram til Dana White, forseta UFC. Málinu hafi verið fylgt eftir og símafundur hafi verið boðaður í næstu viku.
Heimildarmenn TMZ staðhæfa að báðir aðilar séu mjög spenntir fyrir því að bardaginn fari fram í hringleikahúsinu fræga en þar hafa ekki farið fram stórir viðburðir í hundruð ára og aðeins sé rúm fyrir nokkur hundruð manns í einu. Eina undantekningin er þegar Paul McCartney hélt þar góðgerðatónleika fyrir 400 manns árið 2003 en aðrir viðburðir hafa alltaf verið haldnir fyrir utan bygginguna.
Athugasemdir