Helgin var stútfull af rómantík, en bæði stórsöngvarinn Justin Bieber og knattspyrnukappinn Gylfi Þór Sigurðsson fóru á skeljarnar á Bahama-eyjum.
Justin bað fyrirsætunnar Hailey Baldwin en Gylfi sinnar heittelskuðu, Alexöndru Helgu Ívarsdóttur. Báðar sögðu konurnar já og því svífa bæði pörin eflaust um á rósrauðu hamingjuskýi.
Bæði Gylfi og Alexandra deildu fallegri mynd rétt eftir bónorðið og skrifaði Alexandra við sína mynd:
„Eftir fulkominn dag á Bahamaeyjum játaðist ég besta vini mínum. Get ekki beðið eftir að giftast þér, elskan!“
Justin Bieber opnaði sig einnig á Instagram og deildi mynd af sér og Hailey þar sem hann skrifaði meðal annars:
„Þú ert ástin í lífinu mínu Hailey Baldwin og ég myndi ekki vilja eyða ævinni með nokkrum öðrum. Þú gerir mig að betri manni og við pössum svo vel saman!“
Pörin tvö eru langt frá því að vera fyrstu pörin til að trúlofa sig á Bahama-eyjum, en það er afar vinsæll áfangastaður ástfanginna turtildúfa. Spennandi verður að vita hvort að þau ætli einnig að innsigla ástina á eyjunum, en nokkur stjörnupör hafa einmitt gengið í það heilaga á þessum fallega stað.
Penelope Cruz og Javier Bardem
Leikaraparið byrjaði að stinga saman nefjum árið 2007 og giftu sig í byrjun júlí árið 2010. Athöfnin var lítil og aðeins nánustu boðið, en herlegheitin fóru fram heima hjá vini þeirra á Bahama-eyjum.
Cindy Crawford og Rande Gerber
Cindy og Rande játuðust hvort öðru árið 1998 á strönd á Bahama-eyjum. Cindy klæddist afar einföldum en fallegum kjól frá John Galliano og gengu þau hjónin saman upp að altarinu.
Mariah Carey og Nick Cannon
Söngkonan gekk að eiga þúsundþjalasmiðinn á heimili þeirra á eyjunni Windermere á Bahama-eyjum þann 30. apríl árið 2008. Sex árum seinna var ástarblossinn þó slokknaður og Nick sótti um skilnað sem gekk í gegn árið 2016.
Jewel og Ty Murray
Söngkonan og kúrekinn gengu í það heilaga á strönd á Bahama-eyjum árið 2008, eftir áralangt samband. Árið 2014 var gamanið hins vegar búið og þau skildu.
Athugasemdir