Rétt­ar­höldum yfir Gunnari Jóhanni Gunn­ars­syni sem varð hálf­bróður sínum, Gísla Þóri Þór­ar­ins­syni, að bana í bænum Mehamn í Norður-Noregi, í apríl í fyrra, hefur verið frestað um óákveð­inn tíma vegna útbreiðslu kór­ónu­veirunnar, en rétt­ar­höldin áttu að fara fram við Hér­aðs­dóm Vadsø 23. mars. Grunur leikur á að einn fang­inn í fang­els­inu, þar sem Gunnar er vistaður, sé smit­aður af COVID-19 veirunni.

„Það hefði verið léttir að fá lokun í þessu máli. Í stað­inn hangir maður ein­hvern veg­inn í lausu lofti, sem er glatað. Óvissan er verst,“ segir Heiða Þórð­ar­dóttir, systir bræðr­anna, sem hafði áformað að vera við­stödd rétt­ar­höldin í mars. Hún tekur fram að sér finn­ist frest­unin hins vegar ásætt­an­leg í ljósi þeirrar hættu sem nú steðjar að allri heims­byggð­inni vegna útbreiðslu COVID-19 kór­óna­veirunnar. Við séum peð í þessu ástandi – og eigum að standa saman.

Og ljóst er að áhrif af völdum COVID-19 veirunnar teygja sig víða því Heiða segir að sá grunur sé nú uppi að einn fang­inn í fang­els­inu þar sem Gunnar bróðir hennar er vistaður sé smit­aður. „Sá er í ein­angrun á meðan kom­ist er að nið­ur­stöðu. Fyllstu örygg­is­gæslu er gætt, engar heim­sóknir leyfðar, lík­ams­rækt­ar­stöð­inni hefur verið lokað og svo fram­vegis,“ segir hún og getur þess að Gunnar sé furðu slakur miðað við aðstæður.

Bræð­urnir Gunnar Jóhann og Gísli Þór

Blæddi út á skömmum tíma

Eins og fram hefur komið í fjöl­miðlum er Gunnari gefið að sök að hafa farið með hagla­byssu inn á heim­ili Gísla Þórs í Mehamn klukkan fimm að morgni 27. apríl 2019. Eru bræð­urnir sagðir hafa tek­ist á um með vopnið með þeim afleið­ingum að tvö skot hlupu af  og hafn­aði annað þeirra í vinstra læri Gísla með þeim afleið­ingum að honum blæddi út á skömmum tíma.

Gunnar lýsti sig í kjöl­farið sekan um mann­dráp af gáleysi, en þann 21. jan­úar gaf hér­aðs­sak­sókn­ar­inn í Troms og Finnmörk út ákæru á hendur honum, þar sem honum er gefið að sök mann­dráp af ásetn­ingi. Er ákæran í sex liðum og er Gunnar meðal ann­ars ákærður fyrir hús­brot á heim­ili hálf­bróður síns, brot á nálg­un­ar­banni gagn­vart honum, að hafa tekið bif­reið hans ófrjálsri hendi eftir atvikið og ekið henni undir áhrifum áfengis og amfetamíns.

Í öðrum lið ákærunnar er Gunnari gefið að sök að hafa haft í hót­unum við Gísla Þór dag­ana fyrir and­lát hans, og eins við Elenu Undeland barns­móður og fyrrum eig­in­konu Gunnars.

Sorgin skrítið fyrirbæri

Í við­tali við Mannlíf í haust sagði Heiða frá sorg­inni eftir að Gísli Þór var skot­inn af Gunnari. Hún sagði sorg­ina hafa verið þá þyngstu sem hún hefur upp­lifað. „Þetta hefur nátt­úr­lega verið alveg svaka­lega erf­iður tími,“ sagði Heiða. „Þótt ég syrgi auð­vitað Gísla bróður minn óskap­lega mikið þá er Gunnar líka bróðir minn og ég get ekki hatað hann fyrir þetta slys.“

Heiða segir sorg­ina vera skrítið fyr­ir­bæri. Eftir að hafa ein­angrað sig gjör­sam­lega frá umhverf­inu í marga mán­uði hafi hún tekið þann pól­inn í hæð­ina að styrkja sig lík­am­lega og and­lega. „Ég hef náð að þynga­jst og styrkst og er aftur farin að taka þátt í félags­störfum. Heyri reglu­lega í Gunna og dreymi Gísla minn oft. Þetta er allt á réttri leið,“ segir hún og kveðst reikna með því að rétt­ar­höldin yfir Gunnari bróður hennar komi til með að fara fram í sumar.

Mynd / Hallur Karlsson