Sjaldséður herfugl sást spóka sig í Fellabæ um liðna helgi.
Austurfrétt segir frá því að starfsmanni Náttúrustofu Austurlands hafi brugðið þægilega í brún síðustu helgi þegar viðkomandi rakst óvænt á herfugl í Fellabæ, á Héraði.
Annað slagið berast fréttir af þessari fuglategund hér á landi en heimkynni hennar er fyrst og fremst í Evrópu, Asíu og norðurhluta Afríku. Það sem gerir þá sérstaka er mjög áberandi kambur á höfðinu og furðulegt fluglag sem tekið er eftir. Undantekningarlaust eru þeir með hvítt- og svart röndótt bak, samkvæmt Austurfrétt.
Indriði Skarphéðinsson tók ljósmyndina sem fylgir fréttinni en fuglinn var að spóka sig um síðustu helgi fyrir utan heimili hans og Kolbrúnar Sverrisdóttur, líffræðings hjá Náttúrustofunni en þau búa í Fellabæ á Héraði.
Að því er fram kemur í frétt Austurfréttar, hefur Kolbrún aldrei áður séð herfugl berum augum en óskar eftir upplýsingum frá fólki ef það telur sig verða vart við flækingsfuglinn einhvers staðar.
„Ég held að slíkir fuglar hafi aðeins sést hér á landi í 20 skipti eða svo þannig að þetta er sérstakt. Hann er auðvitað á kolröngum stað á hnettinum á þessum tímapunkti enda meira um þá við Miðjarðarhafið þar sem hitastigið er töluvert hærra. Hann hefur líklega komið hingað í veðrinu um daginn og því miður finnst mér ólíklegt að hann komist heim til sín úr þessu,“ sagði Kolbrún í samtali við Austurfrétt.
Athugasemdir