Hin breska Amber Hunt var í fríi í Króatíu með manni sínum og tveimur börnum þegar hún gleypti óvart 20 cm langan tannbursta. Hún telur sig heppna að vera á lífi eftir ótrúlegt atvikið. Amber var að undirbúa sig fyrir svefninn þegar tannburstinn rann úr blautum höndum hennar og niður í kok, þaðan fór hann niður í maga. Hún reyndi þá að ná burstanum en þegar það tókst ekki fór eiginmaður hennar með hana á sjúkrahús. Læknar trúðu varla eigin eyrum þegar Amber lýsti atvikinu fyrir þeim og var hún þá send í ómskoðun á maga þar sem tannburstinn kom í ljós.
Þrátt fyrir ítrekaðar tilraunir reyndist læknum ómögulegt að ná til burstans og neyddist konan til þess að ganga undir tæplega klukkutíma langa aðgerð þar sem hann var fjarlægður. Tæki var þrætt ofan í magann á Amber og burstinn dreginn upp en hún var vakandi á meðan. „Ég er ánægð að vera á lífi en er hrædd við að nota tannbursta og fer alltaf varlega, ég passa að hendurnar séu þurrar svo burstinn renni ekki úr höndunum á mér,“ sagði konan í samtali við Mirror. „Sem betur fer fór burstinn niður í maga í stað þess að kæfa mig. Þegar ég áttaði mig á því að ég væri búin að gleypa tannburstann var ég viss um að ég myndi deyja. Ég mun héðan af fara varlega þegar ég bursta í mér tennurnar.“
Athugasemdir