Úkraínska leyniþjónustan hefur viðurkennt að hún hafi staðið á bak við morðið á háttsettum rússneskum hershöfðingja í Moskvu í morgun. Hinn myrti, Igor Kirillov, sem lést þegar sprengja sem hafði verið komið fyrir á rafhlaupahjóli, sprakk í miðborg Moskvu í morgun. Málið þykir vandræðalegt fyrir Vladimir Putin, Rússlandsforseta.
Sprengjan sem banaði Kirillov, sem var hershöfðingi í rússneska hernum og yfirmaður kjarnorku- og geislavarna, var falin í rafhlaupahjóli við innganginn að heimili hans í Moskvu. Að sögn rússneskra yfirvalda var sprengjunni fjarstýrt. Aðstoðarmaður Kirillov lést einnig í árásinni.
Að sögn rússneskra fjölmiðla innihélt sprengjan um 300 grömm af TNT-sprengiefninu og að hún hafi verið sprengd með fjarstýringu.
Samkvæmt RÚV tók hershöfðinginn við stöðu yfirmanns kjarorku- og geislavarna í Rússlandi 2017 en hann hefur verið sakaður um að heimila notkun efnavopna í innrás Rússlandshers í Úkraínu. Í haust gáfu Bretar út ferðabann á Kirillov og frystu eignir hans. Var farið í þær refsiaðgerðir vegna bæði notkunar efnavopna og vegna þess að hann stuðlaði að dreifingu falsfrétta.
Í gær kærði leyniþjónusta Úkraínu Kirillov fyrir notkun hans á efnavopnum í Úkraínu og heldur leyniþjónustan því fram að Rússar hafi notað efnavopn í 4.800 í skipti frá því að innrásin hófst. Segir hún að um tvö þúsund hermenn úkraínuhers hafi verið fluttir á sjúkrahús eftir slíkar árásir og að þrír hafi látist.
Leyniþjónustan hefur nú gengist við morðinu á hershöfðingjanum, samkvæmt Sky News.
Athugasemdir