Páll stöðumælavörður rifbeinsbrotinn í vinnunni: „Við erum alveg varnarlausir“

Stöðu­mæla­verðir Páll Pálsson og Jóhann Dagur Björg­vins­son lentu í hremm­ingum í vinn­unni árið 1996.

„Ég var að skrifa bíl upp í Fischersundi og kall­aði í Pál og bað hann um að hjálpa mér,“ sagði Jóhann Dagur við DV um málið. „Rétt á eftir lenti ég í skæða­drífu af kók­flöskum úr plasti sem splundr­uð­ust í kringum mig. Sá sem það gerði stakk af um leið og ég var búinn að láta hringja á lög­regl­una. Síðan sett­umst við Páll inn í vinnu­bíl minn og ætl­uðum að bíða eftir lög­regl­unni. Á meðan veltum við fyrir okkur hvort Páll ætti að skrifa upp annan bíl á sama stað og við ákváðum að hann skyldi gera það,“ sagði Jóhann Dagur. „Ég gekk að bílnum og lagði miða á hann,“ sagði Páll. „Bíl­eig­and­inn kom þá að mér, þandi út á sér brjóst­kass­ann og ég vissi ekki af mér fyrr en hann hafði kastað mér í göt­una. Þetta gerð­ist mjög snöggt. Ég staulað­ist á fætur og ætl­aði að ganga að bíl Jóhanns en þá elti mað­ur­inn mig og sveifl­aði mér snögg­lega upp að hús­vegg. Í þeim svifum kom Jóhann út úr bílnum og mað­ur­inn hljóp i burtu,“ en síðar kom í ljós að Páll var rif­beins­brot­inn eftir árás­ina.

Ekki fíkni­efna­neyt­endur

Samkvæmt Páli var þetta í þriðja skipti á árinu sem ein­hver réðst á hann í vinn­unni. Jóhann sagði við DV að hann hefði einnig ítrekað lent í árásum.

„Fyrir tæpu ári var ráð­ist á mig á bílaplani skammt frá Ráð­hús­inu. Ég var við eft­ir­lit og maður sem hafði fengið miða frá öðrum stöðu­mæla­verði réðst á mig og henti mér á göt­una. Ég marð­ist þá á öxl og brjóst­kassa. Í febr­úar var ég síðan að leggja sekt­ar­miða á bíl i Banka­stræti. Ég var þá dreg­inn inn í Þing­holts­strætið og skellt upp að vegg og haft í hót­unum við mig,“ sagði Páll en þeir félagar töldu ekki að um væri að ræða fíkni­efna­neyt­endur.

„Ald­urs­hóp­ur­inn frá 17 ára upp í þrí­tugt er orð­inn miklu harð­ari en áður var. Við vitum líka til þess að reynt hafi verið að aka stöðu­mæla­vörð, stúlku, niður og mun­aði litlu að illa færi því hún var með far eftir hlið­ar­spegil á bak­inu á eftir. Við erum alveg varn­ar­lausir og megum ekki verja okkur og í raun ekki svara fyrir okkur heldur. Við munum ræða þetta við yfir­menn okkar á morgun enda getum við ekki sætt okkur við þetta hlut­skipti.“

Þá sögðu stöðu­mæla­verð­irnir að þeir þekktu til árás­armanns­ins og þeir myndu kæra árás­ina til lög­reglu.

Í fram­halds­frétt sem DV skrif­aði um málið árið 1997 var sagt frá því að 26 ára karl­maður hafi veirð dæmdur til að greiða Páli 120 þús­und krónur fyrir rif­beins­brotið. Þá var hann einnig dæmdur í 2 mán­aða fang­elsi en sú refs­ing var skil­orðs­bundin í þrjú ár.