Sigurður Þor­geirs­son varð fyrir því óláni að vera rændur af hópi ribb­alda í Par­ís­ar­borg í júlí 1990, þar sem hann bjó og starf­aði á frétta­stofu.

Sigurður Þor­geirs­son sat í róleg­heit­unum á bekk í almenn­ings­garði í Pigalle-hverf­inu í París og átti sér einskis ills von þegar hann fann hnífs­blað þrýst að hálsi hans. Voru þar komnir nokkrir þorp­arar í leit að verð­mætum en þeir höfðu af Sigurði tals­vert fé auk skil­ríkja, greiðslu­kort og ávísun.

Málið var allt hið kald­hæðn­asta því Sigurður hafði einmitt verið að vinna að verk­efni um ill­þýði Par­ís­ar­borgar.

Hér fyrir neðan má lesa um umfjöllund DV frá 31. júlí 1990:

Íslend­ingur rændur í París:

Vissi ekki fyrr en ég fann hnífs­egg þrýst að hálsi mér — segir Sigurður Þor­geirs­son

ÍSLENSKUR maður búsettur í París, Sigurður Þor­geirs­son, var nýverið rændur í Pigalle-hverf­inu þar í borg. Hann sat á bekk í almenn­ings­garði er nokkra mis­ynd­is­menn dreif að, og áður en hann vissi fann hann hnífs­egg þrýst að hálsi sér. Eftir að hafa tæmt vasa Sigurðar hurfu þeir á brott. Þeir náðu meðal ann­ars frönskum skil­ríkjum hans, greiðslu­korti, og 3000 frönkum, um 30 þús­und íslenskum krónum, í reiðufé. Einnig höfðu þeir á brott með sér ávísun á laun sem Sigurður hafði fengið greidd þennan dag, en ávís­un­ina sagð­ist hann fá bætta.

Sigurður, sem hefur búið erlendis í 20 ár, starfar hjá frétta­stofu í París og hefur und­an­farið unnið að ljós­myndun fyrir verk­efni sem einmitt fjallar um óþjóða­lýð borg­ar­innar og nefn­ist „Und­ir­heimar Parísar.“ „Það er hálf neyð­ar­legt að lenda í þessu eftir að hafa búið erlendis í tutt­ugu ár,“ sagði Sigurður í sam­tali við Morg­un­blaðið. „Þetta sannar að fólki er ekki lengur hætt­andi inn á Pigalle-svæðið nema í stærri hópum, þrátt fyrir að það sé kunn­ugt á þeim slóðum. Lög­reglan sagði mér þegar ég kærði atburð­inn að á þessu svæði væri nú orðið myrt fyrir 10 franka (um 100 krónur íslenskar).“ Sigurður sagði, að ekki væri van­þörf á að minna ferða­fólk á að vera var­kárt á ferðum erlendis, ekki síst í hverfum á borð við Pigalle-hverfið í París.