Herði Hilm­ars­syni var alls ekki skemmt árið 1996 þegar þrjótar stálu pen­inga­skáp hans en DV greindi frá mál­inu.

Forsaga máls­ins er sú að pen­inga­skáp­ur­inn hafði staðið fyrir framan verk­stæði Harðar í nokkra daga en lyft­ari hans var bil­aður og gat hann því ekki komið skápnum fyrir á réttum stað. Dag einn árið 1996 mætti Hörður til vinnu og þá var skáp­ur­inn horf­inn en hann var tæp­lega 700 kíló að þyngd.

„Mér finnst þetta bara fárán­legt og skil þetta ekki enn. Ég get ekki ímyndað mér hvað hefur vakað fyrir þeim sem tók skáp­inn því það hljóta allir að sjá að maður geymir ekki verð­mæti í skáp sem stendur utandyra,“ sagði Hörður við DV um þjófn­að­inn.

Mögulega hrekkur

Eftir nokkra leit fannst þó skáp­ur­inn í frysti­húsi í bænum og hafði verið komið fyrir í kassa­geymslu þessu og því ljóst að ein­hver með aðgang að lyft­ara hafi komið honum þar fyrir. Það hafi hins vegar margir starfs­menn stað­ar­ins haft lykil að lyft­ara svo það reynd­ist ómögu­legt að vita hver bar ábyrgð á þjófn­að­inum.

„Kannski hefur ein­hver ætlað að gera at í mér og þótt þetta fyndið. Mér er hins vegar ekki skemmt og ég er eig­in­lega ekki enn búinn að átta mig á þessu. Mér finnst þetta svo fárán­legt,“ sagði Hörður en að sögn hans voru aðeins ómerki­leg per­sónu­leg skjöl í skápnum.

Lyftara þurfti til að sækja skáp­inn í geymsl­una og var honum komið fyrir inn á verk­stæði Harðar.