Minnst 18 látin eftir árekstur herþyrlu og farþegaflugvélar í Washington – 49 saknað

Minnst 18 eru látnir eftir að far­þega­flug­vél hrap­aði ofan í Potomax-á nærri Reagan-flug­velli í Washington D.C., eftir árekstur við her­þyrlu.

Slysið varð klukkan níu í gær­kvöldi að stað­ar­tíma en að sögn yfir­valda rakst her­þyrlan á far­þega­þot­una. Samkvæmt flug­fé­lag­inu American Airlines voru 60 far­þegar um borð og fjögra manna áhöfn. Í þyrl­unni, af gerð­inni Black Hawk, voru þrír banda­rískir her­menn.

Samkvæmt RÚV héldu yfir­völd blaða­manna­fund í morgun en þar komu engar upp­lýs­ingar fram um slys á fólki eða hvort ein­hverjir hefðu fund­ist látnir. Tveir heim­ild­ar­menn NBC segja að á annan tug líka hafa fund­ist í ánni en björg­un­ar­að­ilar vinna í kappi við tím­ann við að finna fólk á lífi í ánni.

Slökkvi­liðs­stjóri í Washington D.C., John Donnelly, segir aðstæður til björg­un­ar­leitar erf­iðar, það sé dimmt og fá ljós til að lýsa upp ánna. Sagði hann báta vera mætta að flaki flug­vél­ar­innar en vissi ekki um hvort ein­hverjir hefðu lifað af.

„Við gerum ráð fyrir að halda aðgerðum áfram í ein­hverja daga.“

RÚV segir frá því að CBS-frétta­stofan í Banda­ríkj­unum hafi eftir heim­ild­ar­manni innan lög­regl­unnar að minnsta kosti 18 lík hafi fund­ist í ánni og að enn hafi engir eft­ir­lif­endur fund­ist.

Vegna flug­slyss­ins hefur Reagan-flug­velli í Washington D.C. verið lokað og verður haldið lok­uðum í dag en slysið hefur að sögn Icelandair ekki áhrif á flug­á­ætlun þar sem flug­fé­lagið not­ast við Dulles-flug­völl. Þá býst Play einnig við að áætlun flug­fé­lags­ins haldi, í ljósi þess að flug­fé­lagið flýgur til Baltimore.

Bandarísk og rússnesk listskautarar í flugvélinni

Fram kemur í frétt RÚV að félagar í list­skautaliði Banda­ríkj­anna hafi verið í flug­vél­inni, sem var að koma frá Wichita í Kansas-fylki. Var þar verið að halda lands­mót og þjálf­urn­ar­búðir fyrir list­skaut­ara en í yfir­lýs­ingu frá List­skauta­fé­lagi Banda­ríkj­anna kemur fram að fjöl­margir íþrótta­menn, þjálf­arar og fjöl­skyldu­með­limir hafi verið í flug­vél­inni.

„Við erum nið­ur­brotin vegna þessa sorg­lega atburðar og hugsum til aðstand­enda fórn­ar­lambanna. Við höldum áfram að fylgj­ast með mál­inu,“ segir í yfir­lýs­ing­unni.

Þá segir rúss­neski fjöl­mið­ill­inn TASS að tveir rúss­neskir list­skaut­arar og þjálf­arar þeirra hafi einnig verið um borð.