Tvær af þremur konum, þær Kiana Sif Limehouse og Helga Elín Herleifsdóttir, sem sökuðu lögreglumann um kynferðisbrot þegar þær voru barnungar halda ræðu eftir að Druslugangan hefur verið gengin í dag.
Gangan hefst við Hallgrímskirkju klukkan 14.00 í dag, laugardaginn 28. júlí. Þaðan fer hún niður Skólavörðustíg og Bankastræti og endar á Austurvelli, þar sem verða ræðuhöld og tónleikar.
Helga Elín prýddi forsíðu Mannlífs fyrir nokkrum vikum ásamt móður sinni, Halldóru Baldursdóttur. Þar sögðu þær frá kynferðisbroti sem átti að hafa átt sér stað í sumarbústaðaferð með fyrrnefndri Kiönu, þá bestu vinkonu Helgu Elínar, og lögreglumanninum, sem þá var stjúpfaðir Kiönu. Með í för voru einnig móðir Kiönu og vinahjón. DV hefur einnig fjallað um mál kvennanna þriggja þar sem bæði lögreglumaðurinn og vinahjónin voru nafngreind. Þá hefur lögreglumaðurinn hótað málsókn vegna umfjallanar Stundarinnar um málið sökum notkunar á orðinu nauðgun.
„Ríkislögreglustjóri brást dóttur minni“
Kiana steig svo stuttu síðar fram í forsíðuviðtali við Mannlíf þar sem hún sagði sína sögu af lögreglumanninum.
„Ég svaf alltaf uppi í rúmi hjá mömmu þegar hann var að vinna. Þegar hann færði mig á milli rúma man ég eftir að hann byrjaði að þukla brjóstin á mér. Ég var vakandi en lét sem ég svæfi. Ég vissi að þetta var ekki rétt en ég sagði ekki neitt. Ég var lítil og hafði ekki vit á því að þetta væri óeðlilegt. Síðan fór þetta að vinda upp á sig. Hann bauð mér að smakka áfengi og einhverju síðar man ég eftir honum standandi í dyrunum á herberginu mínu þegar ég var sofandi. Þá hafði hann verið að drekka og þuklaði á sjálfum sér. Eitt kvöldið tók hann það skref að koma inn í herbergið mitt og snerta mig. Hann setti puttana inn í píkuna á mér og hélt mér þannig að ég myndi ekki snúa mér við. Þegar ég bað hann um að hætta sagði hann að þetta væri bara leyndarmálið okkar. Ég man enn í hvernig buxum hann var þetta skiptið. Ég man enn hvernig rakspírinn hans lyktaði,“ sagði Kiana í viðtalinu.
„Kvöldið áður en ég sagði frá misnotaði hann mig í seinasta skiptið“
Helga Elín, Kiana og þriðja stúlkan, Lovísa Sól, kærðu lögreglumanninn allar fyrir kynferðisbrot, en málin voru látin niður falla vegna ónægra sannanna.
Móðir Helgu Elínar kærði rannsókn máls dóttur sinnar til nefnd með eftirlit með lögreglu en erindi hennar sem sneri beint að óvandaðri lögreglurannsókn var vísað frá.
„Tími þagnar og afvegaleiðinga er liðinn. Við krefjumst breytinga“
Kæra lögregla…
Auk Helgu Elínar og Kiönu er framhaldshópur Stígamóta með tölu, sem og María Rut Kristinsdóttir, fyrrverandi talskona Druslugöngunnar. Þá verða GDRN, Sykur og DJ Dóra Júlía með tónlistaratriði.
Forsvarsfólk Druslugöngunnar hefur einnig sent sérstök boðskort á lögregluyfirvöld þar sem það skorar á þau að taka afstöðu gegn ofbeldi og afstöðu með þolendum.
„Kæra lögregla. Við vitum að hjá ykkur er margt gott starf unnið, en innan ykkar raða eru ennþá einstaklingar sem bregðast okkur og misbeita valdi sínu. Þið tilheyrið starfsstétt sem við þurfum að geta treyst á,“ stendur í boðskortinu. Alþingismenn, ráðherrar og forsetahjónin hafa einnig fengið boðskort í gönguna.
Druslugangan er samstöðuganga með þolendum kynferðislegs ofbeldis og var fyrst haldin árið 2011. Megin markmið göngunnar, að því er kemur fram á Facebook-síðu hennar, er að „losa þolendur undan skömminni sem kynferðislegt ofbeldi á til að skilja eftir sig og skila henni þangað sem hún á heima, til gerenda.“
Athugasemdir