Óhætt er að segja að eld­húsið sé hjarta heim­il­is­ins; þar sem fjöl­skyldan snæðir saman í upp­hafi og lok hvers dags. Þess á milli er svo verið að læra heima, vinna eða baka brauð eða vand­ræði í eld­hús­inu.

Þessar sam­veru­stundir fjöl­skyld­unnar eru svo dýr­mætar, sér­stak­lega þegar snjall­tæki eru bönnuð við mat­ar­borðið, þá næst þessi gamla góða teng­ing og nánd án áreitis sam­fé­lags­miðla og sím­hring­inga. Og hver kann­ast svo ekki við að hafa endað í góðu eld­húspar­tíi þar sem fjörið færð­ist úr stof­unni og allir fóru á eld­hús­trúnó!

Opið og bjart eld­hús með engum efri skápum eða höldum. Hvít hand­laug, borð­plata, flísar og inn­rétt­ing. Hvítur vegg­lampi og ljós­myndir eftir meist­ara RAX sem setja punkt­inn yfir i-ið í þessu leik­andi létta og ljósa eld­húsi.

Sjar­mer­andi og kósí eld­hús undir súð í Bryggju­hverf­inu. Þessi inn­rétt­ing var ljós­brún en var spraut­ulökkuð hvít hjá sprautun.is. Hvítar subway-flísar, retró kæli­skápur, plöntur og myntu­grænir veggir skapa hressandi stemn­ingu í þessu sæta eld­húsi.

Fag­ur­fræðin fær að njóta sín í þessu fal­lega eld­húsi sem Rut Kára­dóttir inn­an­húss­arki­tekt hann­aði. Klass­ískt og tíma­laust eld­hús þar sem inn­rétt­ingin sem er frá Smíða­þjón­ust­unni er með lóð­réttum fræs­ingum sem er fal­legt. Borð­platan er kvart­steinn frá Rein, bar­stól­arnar eru frá NORR11 og ljósið er úr Módern.

Hlýlegt og feikna­fal­legt opið eld­hús með stórri eyju sem Sæbjörg Guð­jóns­dóttir inn­an­húss­arki­tekt hann­aði. Inn­rétt­ingin er frá Fagus, borð­platan frá Granít­steinum og bar­stólar úr Epal. Þarna er mikið skápa­pláss og gott vinnu­rými og takið eftir gólf­inu sem er bara flotað og kemur svona líka vel út.

Coca Cola-þema í svörtu eld­húsi í Þor­láks­höfn en svartar eld­húsinn­rétt­ingar hafa verið í tísku und­an­farið og þá er ekki verra að brjóta örlítið upp með rauða Coca Cola-litnum. Inn­rétt­ingin er háglans úr IKEA, borð­platan er frá Fant­ó­fell, ljós úr BYKO og bar­stól­arnir voru keyptir í Hús­gagna­höll­inni.

Fallegt og stíl­hreint eld­hús sem Berglind Berndsen hann­aði. Dökk inn­rétt­ing og dökkur marm­ara­steinn skapa glæsi­legt eld­hús þar sem risa­stór eyjan fær að njóta sín.

Myndir / Hús og Híbýli