Tíu ár eru liðin síðan Margrét hætti að ganga í galla­buxum og segir hún það vera bestu ákvörðun sem hún hafi tekið. „Ég var alltaf lítil í mér að finna ekki góð snið utan um rass­inn á mér og fékk alltaf illt í bakið af því að vera í galla­buxum. Ég er meira fyrir það að klæða mig frekar of fínt en kasjúal. Ég elska svart og ég nota mikið af fylgi­hlutum til að djassa upp það sem ég á fyrir. Efst á óska­list­anum eru alltaf nær­föt frá Lonely sem fást í Kven­fata­verslun Kormáks og Skjaldar.“

Þessa dag­ana er Margrét í átaki, mjög erf­iðu átaki, að eigin sögn. „Ég setti mér ára­móta­heit um að kaupa ekki föt á árinu 2019. Ég held að þetta muni breyta fata­kaupum hjá mér að eilífu. Ég má þó kaupa mér sokka, nær­föt, sokka­buxur og bún­inga. Á meðan ég er í þessu átaki fæ ég mik­inn inn­blástur úr kvik­myndum og eldri ljós­myndum og myndum.

Núna skoða ég mest klass­ísk föt sem detta ekki úr tísku í næsta mán­uði og und­ir­strika hvað mér finnst fal­legt við sjálfa mig. Sú sem kenndi mér allra mest varð­andi ýmis konar stæl­ingar er Ragna Fossberg, frá þeim tíma þegar ég vann hjá RÚV og ég kann henni bestu þakkir fyrir.“

Aðspurð í hvaða búðum hún versli helst nefnir Margrét net­versl­un­ina pinupgirlclothing.com. „Verið þol­in­móð, það þarf að fara vel í gegnum alls konar grín­föt en svo eru þarna algjörar ger­semar inn á milli,“ segir hún.

„Mér finnst ótrú­lega leið­in­legt hversu margar búðir sem mig langar að kaupa mér föt í virð­ast ekki eiga neitt í minni stærð og versla við merki sem fram­leiða ein­fald­lega ekki föt í minni stærð. Eins og þær vilji ekki pen­ing­ana mína.“

Nýjustu kaupin í fataskápnum

„Three piece-kvenjakka­föt frá Walker Slater frá Kven­fata­verslun Kormáks og Skjaldar. Hlý, klæði­leg og hægt að stæla í allar áttir. Mjög ánægð með þessi síð­ustu kaup fyrir átak.“

Uppáhaldsflíkin

„Á síð­asta ári lét ég Svan­hvíti vin­konu mína gera fyrir mig ótrú­legan perlu­kjól fyrir burlesque-ið. Það er ákveðið skref þegar kona hættir að búa til bún­inga með lím­byssu og leitar til fag­fólks. Svanhvít Thea er ótrú­leg lista­kona sem skilur hvernig burlesque-bún­ingar þurfa að virka. Kjóllinn er ótrú­leg völ­und­ar­smíð insprí­er­aður af art deco og hreyf­ist ótrú­lega fal­lega. Ég kom fram í honum á gamlárs­kvöld á Slipper Room í New York og fólk tryllt­ist yfir honum. Tryllt­ist.“

Uppáhaldsfylgihluturinn

„Refa-keip sem ég keypti í Mauerpark í Berlín fyrir fimm árum. Passar við allt og svo er hann svona krútti­lega rang­eygður, þessi elska. Svo er ég með hring á hverjum degi sem mamma mín fékk í ferm­ing­ar­gjöf frá Auði bestu vin­konu sinni og það er risa­silf­ur­klumpur frá Jens.“

Flíkin með mesta tilfinningalega gildið

„Barbour-vaxjakk­inn. Að eiga vaxjakka er eins og að eiga gælu­dýr. Það verður að vaxa hann tvisvar á ári og þá eigum við jakk­inn fal­lega dúllu­stund saman. Hann verður fal­legri með hverju árinu og mér þykir ótrú­lega vænt um hann.“

Myndir / Heiðdís Guðbjörg Gunn­ars­dóttir