Stíl­hreini TAB-lamp­inn fyrir Flos.

Edward Barber og Jay Osgerby eru báðir fæddir árið 1969 og stund­uðu saman meist­ara­nám í arki­tektúr í The Royal College of Art í London. Þaðan útskrif­uð­ust þeir árið 1996 og stofn­uðu í kjöl­farið hönn­un­ar­stof­una Barber & Osgerby en árið 2001 stofn­uðu þeir einnig Uni­ver­sal Design Studio sem ein­blínir á arki­tektúr- og inn­an­húss­hönnun. Í dag reka þeir eitt fremsta og virtasta iðn­hönn­un­ar­stúdíó í Bret­landi.

Vítt svið verkefna

Fyrst um sinn fikruðu þeir félagar sig tölu­vert áfram með flöt bygg­ing­ar­efni, eins og plexí­gler og kros­svið og á þessum árum hönn­uðu þeir fjölda hús­gagna, þar á meðal var Shell Table sem til­nefnt var til Compasso d‘Oro-verð­laun­anna.

Á Salone del Mobile í Mílanó árið 2011 kynntu hönn­uð­irnir til leiks stól­inn Tip Ton, sem unn­inn var í sam­starfi við hús­gagna­fram­leið­and­ann Vitra. Mikil rann­sókn­ar­vinna bjó að baki hönnun stóls­ins og með því að grand­skoða skóla­hús­gögn komust þeir að því að dínamísk hreyf­ing meðan setið er getur aukið ein­beit­ing­una. Stuttu eftir frum­sýn­ingu stóls­ins fengu hönn­uð­urnir það verk­efni upp í hend­urnar að hanna ólymp­íu­kyndil­inn fyrir London Olympics 2012 og hlutu hönn­un­ar­verð­laun árs­ins 2012 hjá London Design Museum fyrir hann.

Árið 2013 hélt neð­an­jarð­ar­lest­ar­kerfi London upp á 150 ára afmæli sitt og hlutu þeir Edward og Jay þann heiður að vera ráðnir í að hanna £2 mynt fyrir til­efnið, en myntin var aðeins fram­leidd í tak­mörk­uðu upp­lagi.

Edward og Jay hönn­uðu þessa mynt í til­efni 150 ára afmælis neð­an­jarð­ar­lest­ar­kerf­is­ins í London.

In the making

Edward Barber og Jay Osgerby stýrðu áhuga­verðri sýn­ingu árið 2014 í The Design Museum sem bar nafnið „In the Making“. Umfjöll­un­ar­efnið var hið dulda líf hvers­dags­legra hluta eins og ljósa­peru, gler­kúlu, blý­anta, smá­myntar, skófatn­aðar, hatta og krikket­kylfa. Yfir tutt­ugu hlutir voru fang­aðir á ólíkum stöðum í fram­leiðslu­ferl­inu og var áherslan á feg­urð­ina í því ókláraða. Oftar en ekki er ókláraði hlut­ur­inn áhuga­verð­ari og fal­legri en hin full­búna vara. Sýningin vakti mikla lukku og mun hún verða sett upp að nýju á safn­inu nú í vor.

Kollar fyrir Knoll.

Listrænar skissur

Teikn­ingar og skissur hönn­un­ar­dúós­ins hafa vakið mikla athygli, enda eru þær með ein­dæmum fal­legar. Árið 2015 gáfu hönn­uð­irnir út bók­ina „One by One“, sem geymir valin verk­efni áranna á undan. Hvert verk­efni er kynnt með stakri mynd eða teikn­ingu en að sögn hönn­uð­anna hefðu flest verk­efnin auð­veld­lega getað spannað heilan kafla eða rit­gerð! Titill bók­ar­innar „One by One“ vísar í hönn­uð­ina sem ein­stak­linga: tveir hönn­uðir sem vinna með ólíka nálgun og hug­myndir sem sam­ein­ast þó ávallt í verk­efnum sínum.

Barber og Osgerby hafa tekið að sér verk­efni fyrir fjöl­mörg þekkt fyr­ir­tæki, en þar má meðal ann­ars nefna Flos, Magis, Esta­bl­is­hed & Sons, Vitra, Axor, Sony, B&B Italia, Venini, Cappellini og Swarovsky. Tvíeykið sem er hvergi nærri því að setj­ast í helgan stein hefur hlotið tugi verð­launa fyrir hönnun sína og verður spenn­andi að sjá hvað þetta fjöl­hæfa hönn­un­ar­dúó tekur sér næst fyrir hendur.

Tvíeykið hann­aði graf­ískar flísar fyrir Mutina.