Ayahuasca er nátt­úr­seyði sem á upp­runa sinn í per­úska hluta Amazon-frum­skóg­ar­ins þar sem frum­byggjar hafa bruggað það til nátt­úru­lækn­inga. Neysla þess kallar fram kröftug ofskynj­un­ar­á­hrif og inni­heldur það efnið dimet­hyl­tryptamine (DMT) sem er á bann­lista á Íslandi og víðar. Það er hins vegar ekki ávana­bind­andi og alls óskylt LSD þótt áhrifin séu að ein­hverju leyti keim­lík. Lítið er vitað um lang­tíma­á­hrif seyð­is­ins en dæmi eru um að fólk hafi lát­ist eftir neyslu þess.

Þekkt er að áhuga­fólk um and­leg mál­efni hafi gert sér ferð til Amazon til að neyta seyð­is­ins en á und­an­förnum árum hefur neysla þess færst í auk­ana á Vest­ur­löndum. Í umfjöllun vest­rænna fjöl­miðla segir að áhuga­fólk um and­leg mál­efni sæki mikið í seyðið en einnig hafi fólk sem glímir við áfallastreituröskun, fíkni­vanda og þung­lyndi notað það.

Boðsferðir í einkaskilaboðum

Mannlíf hefur haft spurnir af því að vin­sældir ayahuasca fari vax­andi á Íslandi. „Fólk er farið að neyta þess í auknum mæli og með nýjum aðferðum. Til dæmis að veipa það,“ segir einn við­mæl­andi Mannlífs. Þá hefur hópur jóga­iðk­enda stundað að fara út á land í skipu­lagðar ferðir þar sem seyðið er haft með í för. „Þetta er að minnsta kosti einu sinni á ári. Þá kemur hingað maður sem býður upp á þetta en þetta stendur ekki öllum til boða. Fólk fær send einka­skila­boð á Facebook með boði um þátt­töku.“

Annar við­mæl­andi Mannlífs stað­festir að hópur jóga­iðk­enda hafi safn­ast saman á sveitabæ nærri höf­uð­borg­ar­svæð­inu yfir helgi þar sem ayahuasca var neytt.

Perúskur seiðmaður og fjöllistahópur

Tak­mark­aðar upp­lýs­ingar er að finna um neyslu seyð­is­ins á Íslandi. Árið 2016 birt­ist við­tal í Frétta­tím­anum við tvo menn sem voru í 15 manna hópi sem hitt­ist úti í sveit til að drekka ayahuasca. Með í för var per­úskur seið­maður sem brugg­aði seyðið. Annar mann­anna var með krabba­mein en hinn hafði glímt við fíkni­vanda um ára­bil. „Það gerð­ist lítið í fyrsta sinn en í annað skiptið rann allt lífs­hlaup mitt fram hjá mér, alveg frá því ég var sex ára og fram á dag­inn í dag,“ lýsir annar þeirra áhrif­unum. Í þætt­inum Rapp í Reykja­vík sem sýndur var á Stöð 2 árið 2016 upp­lýstu með­limir fjöl­lista­hóps­ins Shades of Reykja­vík að þeir hafi stundað neyslu seyð­is­ins.

Á Youtube er einnig að finna 45 mín­útna langan fyr­ir­lestur þar sem maður að nafni Erling Ingason lýsir upp­lifun sinni af neyslu ayahuasca í Amazon-frum­skóg­inum árið 2012. Fer Erling lof­sam­legum orðum um upp­lifun­ina þótt seyðið hafi verið afskap­lega bragðvont og hann hafi kastað kröft­ug­lega upp eftir neyslu þess, sem mun vera algengt.

„Vestræn menn­ing hefur kallað þetta dóp og stór­hættu­legt. Ég get alveg full­vissað ykkur um það að ég hef aldrei verið ánægð­ari, hraust­ari og ákveðn­ari í líf­inu. Mín reynsla var end­ur­fæð­ing og skiln­ingur á líf­inu,“ ritar Erling undir mynd­bandið. „Þetta er það erf­ið­asta sem ég hef gert á ævinni en samt það besta sem hefur komið fyrir mig. Ég missti 9 kíló í þessu ferða­lagi og mér leið eins og ég hafi verið að hlaupa mara­þon alla daga. Hver athöfn á sér stað í myrkri og þú ert alveg einn á dýnu. Áhrifin koma inn eftir 30-40 mín. og vara í 5-8 tíma.“