Miðflokkurinn hefur lýst því yfir að umræðan sé að þeirra mati rétt „að komast almennilega á skrið.“ Í gærmorgun birti þingflokkurinn mynd af hópnum skömmu eftir að þingfundi lauk, klukkan 5.40, með þessari lýsingu. Miðflokkurinn hefur ekki sýnt nein merki um uppgjöf í málinu. Þá virðist stefna flokksins vera að stöðva samþykkt þriðja orkupakkans alfarið og því ólíklegt að finna megi málamiðlun milli Miðflokksins og stjórnarflokka.
Þingfundur hófst í gær klukkan 13.30 og stendur enn þega fréttin er birt nú klukkan sjö að morgni. Umræðan hefur hverfst um þriðja orkupakkann fyrir utan hefðbundna umræðu undir liðnum störf þingsins, skipan stjórnarar Náttúruhamfaratrygginga Íslands og útbýtingu þingskjala.
Samkvæmt starfsáætlun Alþingis er þingfrestun áætluð 5. júní næstkomandi. Eftir því sem nær dregur þeim degi eykst þrýstingur á að klára mál sem fyrir liggja. Í því umhverfi geta flokkar minnihlutans tekið sé stöðu með því að tefja störf þingsins verulega á meðan samið er um afgreiðslu mála á fundum þingflokksformanna. Stöðutakan getur aukið vald stjórnarandstöðunnar.
Samskonar taktík en ríkisstjórnarflokkum í hag er þegar stjórnarmeirihlutinn sveltir þingið stórum og mikilvægum frumvörpum í upphafi þings og fram eftir en dælir svo miklum fjölda verkefna á þingið rétt fyrir lok þess. Þannig skapast tímaþröng og verkefnafjall sem minnkar um leið yfirlestur og dregur úr getu stjórnarandstöðunnar og óbreyttra þingmanna til að grandskoða mál.
Athugasemdir