Að vinna gegn áhrifum streitu og halda sér í góðu jafn­vægi gerir öllum gott – því þegar manni líður vel er maður marg­falt betri útgáfa af sjálfum sér og nær að vera betur til staðar bæði fyrir sjálfan sig og aðra.

Hugræn slökun

Eitt af því áhrifa­rík­asta til að ná innri ró og slökun er hug­leiðsla. Það eru til ótal margar gerðir af hug­leiðslu – núvit­und, leidd hug­leiðsla, kyrjun mantra og margt fleira, en fyrir þá sem hafa enga reynslu af slíku er núvit­und mjög ein­föld og góð leið til að byrja á.

Núvitund snýst um að vera til staðar hér og nú og taka eftir því sem er að ger­ast hið innra. Maður situr með lokuð augun, er beinn í baki og ein­beitir sér að önd­un­inni. Alls konar hugs­anir koma til manns, en maður sleppir tök­unum á þeim jafn­óðum og heldur áfram að ein­beita sér að and­ar­drætt­inum. Smám saman nær maður að slaka betur á og ná betri teng­ingu við til­finn­ingar sínar og sinn innsta kjarna.

Annað sem virkar mjög vel er „yoga nidra“ en það er leidd djúp­slökun.  Gong-slökun er önnur dásam­leg leið til að ná innri ró, þar sem maður liggur á meðan spilað er á hið hljóm­fagra gong.

ASMR-mynd­bönd á YouTube hafa náð gríð­ar­legum vin­sældum út um allan heim og nýta millj­ónir manna sér þau til að ná slökun og auka vellíðan. Fyrir þá sem hafa ekki heyrt um ASMR er um að gera að finna vin­sælt mynd­band á YouTube, setja heyrn­ar­tólin á sig og horfa/hlusta. Þú munt að öllum lík­indum slaka vel á, fá gæsa­húð, kraft­mik­inn hroll … og lík­leg­ast massí­van kjána­hroll með þessu öllu saman.

Ilmkjarnaolíur

Ilm­kjarna­ol­íur geta verið mjög öfl­ugar til að hjálpa manni að slaka á, en ein algeng­asta olían til slök­unar er lavender-olían. Það er hægt að setja nokkra dropa af henni út í vel heitt bað ásamt góðri olíu, slökkva ljósin, kveikja á nokkrum kertum og setja slak­andi tón­list á. Svo er hægt að liggja í bað­inu og nudda lík­amann frá toppi til táar á meðan slakað er á og enda á að liggja í algerri slökun.

Fyrir þá sem eiga erfitt með að ná sér niður og sofna á kvöldin er mjög snið­ugt að eiga blöndu af olíu og lavender-dropum sem notuð er til að nudda sig í smá­stund fyrir svefn­inn. Það er alveg nóg að nudda efri hluta lík­am­ans og maður getur auð­veld­lega gert það sjálfur. Ef maður nennir því ekki getur maður líka sett nokkra dropa á lík­amann og andað að sér ilm­inum, en fyrir þá sem vilja taka þetta alla leið er hægt að kaupa sér ilmol­íu­lampa og setja nokkra dropa í hann þegar maður vill slaka á.

Hreyfing og bætiefni

Flestir tengja kannski ekki hreyf­ingu við slökun, en stað­reyndin er sú að hreyf­ing er ein besta leiðin til að vinna gegn streitu og ná að slaka almenni­lega á. Rólegar göngur, hlaup, jóga og sund eru allt frá­bærar leiðir til að hreyfa lík­amann, en oft getur það veitt enn meiri slökun þegar hreyf­ingin fer fram utandyra í fal­legri nátt­úru; því nátt­úran ein og sér býr yfir sér­stökum heil­un­ar­mætti.

Til eru fullt af alls konar slak­andi jurtum sem not­aðar eru í te eða teblöndur, og er um að gera að nýta sér þær. Sítrónu­melissa, kamilla, fennel og rauðr­unni eru dæmi um jurtir sem hafa slak­andi áhrif. Annað sem margir eru hrifnir af til að ná meiri slökun er magnesí­um­duft. Það er sett út í sjóð­andi vatn og drukkið, til dæmis fyrir svefn­inn.

Texti / Fjóla María Bjarna­dóttir