Góð vika – Hildur Guðnadóttir
Jólin eru tími fagnaðar, gleði og örlætis. Það kom svo sannarlega í ljós í vikunni þegar Aron Einar Gunnarsson, fyrirliði íslenska karlalandsliðsins í knattspyrnu og leikmaður Al-Arabi, fékk gjöf upp á fimm þúsund dollara frá ónefndum vini. Aron var á spítala að jafna sig eftir meiðsli þegar vinurinn mætti og færði honum glaðninginn. Hún var líka falleg gjöfin sem BUGL fékk frá N1, en fyrirtækið styrkti deildina um eina milljón króna og hefur ákveðið að styðja enn frekar við hana, m.a. með því að sjá áfram um rekstur bílaflota BUGL. Þá fékk Hildur Guðnadóttir óvæntan glaðning þegar birtur var svokallaður stuttlisti (short list) yfir listamenn sem eiga möguleika á tilnefningu í níu flokkum til Óskarsverðlauna. Þar komst Hildur á blað fyrir tónlist sína í Joker. Sem kunnugt er hefur hún hlotið fjölda tilnefninga fyrir verk sín m.a. tónlist sína í Chernobyl-þáttunum margrómuðu og nú þokast hún enn nær tilnefningu til Óskarsverðlauna.
Slæm vika – Dagur B. Eggertsson
Óhætt er að segja að Dagur B. hafi ekki átt sjö dagana sæla þar sem hart er sótt að honum úr ólíkum áttum. Þannig sakar Sólveig Anna Jónsdóttir borgaryfirvöld um að taka þátt í að viðhalda ógeðslegu launamisrétti „þegar hún borgar karlinum efst í stigveldinu milljónir og segir konunum neðst að sætta sig við molana af veisluborðinu.“ Formaður Eflingar lætur borgarstjóra heyra það á Facebook og segir að ekki sé hægt að sýna meiri fyrirlitningu en að láta eins og fólk sé ekki til eins og hann geri í tilviki umræddra kvenna. Sigmundur Davíð gerir svo gott betur í pistil í jólablaði Miðflokksins þar sem hann bendir m.a. á að í sumum skólum borgarinnar fái börn ekki að fara í kirkju með skólanum fyrir jól og jafnvel ekki að halda litlu jólin í skólanum. Af pistlinum að dæma virðast á Íslandi vera öfl, þar á meðal borgaryfirvöld, sem vilji úthýsa kristnu jólahaldi. Niðurstaðan virðist vera sú að borgarstjóri sé einskonar andfemínískur kapítalisti sem vilji rústa jólin.
Athugasemdir