Öll þau gos voru smávægileg en frægt er Öskjugosið 1875 sem olli miklu öskufalli og hrakti fólk úr nærliggjandi sveitum. Í grein vísindamannanna er farið nokkrum orðum um mögulegt eldgos í Öskju. Verði sambærilegt gos og árið 1875 eru allir sem staddir eru innan meginöskjunnar í bráðri lífshættu. „Fólki gefst mjög lítill tími til þess að forða sér sökum þess hversu skyndilega gos af þessu tagi geta hafist, nema menn geti brugðist við áður en gosið byrjar,“ segir í greininni. Hættan á slíku gosi er hins vegar hverfandi þar sem einungis eitt sprengigos er þekkt í Öskju fyrir utan gosið 1875.
Enn fremur segir að líklegt sé að eldgos í Öskju hafi nokkurn aðdraganda og að hans verði vart á jarðskjálftamælum og ýmsum öðrum forboðum, þannig að forða megi fólki af svæðinu með góðum fyrirvara. Slíkur fyrirvari gefst þó ekki fyrir berghlaup og flóðbylgju og því er dreifing upplýsinga og viðvarana til ferðafólks og annarra sem um Öskju fara mikilvægari í viðbúnaði vegna flóðbylgjunnar.
Athugasemdir