Fjórtán mán­uðum eftir að versl­un­inni Kúnígúnd var lokað við Laugaveg 53 stendur versl­un­ar­hús­næðið enn autt.

„Það er ein­falt svar við því, fólk er ekki að sækja Lauga­veg­inn og þar af leið­andi finnst fólki ef til vill ekki borga sig að opna þar verslun,“ segir Jórunn Þóra Sig­urð­ar­dóttir, versl­un­ar­stjóri í Kúnigúnd í Kringl­unni, um ástæður þess að hús­næðið við Laugaveg 53 stendur enn autt, fjórtán mán­uðum eftir að versl­un­inni þar var lokað. Versl­unin Kúnígúnd var rekin í 37 ár á Lauga­vegi, síð­ast undir stjórn Þóru.

Spurð hvers vegna versl­un­inni hafi verið lokað segir hún að það hafi ein­fald­lega verið of lítið að gera. „Bíla­stæðum í grennd við búð­ina var fækkað. Það voru upp­haf­lega fimm stæði hinum megin við göt­una en þau voru komin niður í þrjú og hjá einu var staur sem gerði að verkum að við­skipta­vinir okkar, einkum þeir eldri, áttu erfitt með leggja í stæðið og neydd­ust jafn vel til að hætta við. Við urðum reglu­lega vitni að því. Fyrir utan það rugl­aði umræðan um Laugaveg sem göngu­götu marga í rím­inu. Fólk vissi hrein­lega ekki lengur hvort það gæti ekið upp að búð­inni eða hvort það þyrfti að labba. Það fældi marga frá.“

Hún segir að við­skipta­vin­irnir, ekki síst þeir eldri sem eru búsettir við Skúla­götu, hafi eðli­lega orðið mjög leiðir þegar versl­un­inni var lokað við Laug­ar­veg. „Þetta voru fastakúnnar sem áttu í við­skiptum við búð­ina í mörg ár og gerðu sér oft sér­staka ferð í hana. Þeim fannst skelfi­legt að sjá á eftir henni. Okkur þótti ekki síður leið­in­legt að þurfa að loka henni, en maður verður að fá eitt­hvað í kass­ann til að geta rekið hlut­ina.“

Sjá einnig: Tinna lokar verslun sinni á Lauga­vegi: „Ég er ekk­ert að grín­ast þegar ég hef kallað Hrím barnið mitt“

Mörg rótgróin fyrirtæki búin að loka við Laugaveg

Þóra segir að svona sé þetta búið að vera við Laugaveg síð­ustu ár. Þar hafi hvert rót­gróið fyr­ir­tækið á fætur öðru neyðst til að loka vegna ákvarð­ana borg­ar­yf­ir­valda. „Sig­ur­bog­inn, Lífs­stykkja­búðin og Herra­húsið,“ nefnir hún sem dæmi. „Búðir sem voru reknar við góðan orðstír við göt­una um ára­bil. Aðrar versl­anir, eins og Jón & Óskar, hafa þurft að minnka við sig. Sum fyr­ir­tæki hafa ekki séð annan kost í stöð­unni en að fara með starf­sem­ina annað, þar sem aðgengi er betra, og ein­hver hafa blómstrað.“

Í því sam­hengi nefnir Þóra að rekstur versl­ana Kúnígúndar, ann­ars vegar á Gler­ár­torgi á Akureyri og hins vegar í Kringl­unni, þar sem hún er versl­un­ar­stjóri, gangi ljóm­andi vel. „Já, þær búðir ganga mjög vel. Þar er líka nóg af bíla­stæðum og aðgengi gott,“ bendir hún á og seg­ist vera mjög ánægð með fyr­ir­komu­lagið þar.