Lögreglunni á Suðurlandi barst tilkynning um eldsvoða á sveitabæ í Mýrdalshreppi laust fyrir klukkan 21:00 í gærkvöldi. Fyrst var tilkynnt um að eldurinn væri í íbúðarhúsi en síðar kom í ljós að eldurinn reyndist vera í útihúsum sem standa nálægt íbúðarhúsinu.
Allt tiltækt lið slökkviliðs og sjúkraflutninga í Vík ásamt slökkviliðinu á Hvolsvelli og Hellu voru send á staðinn er fram kemur í færslu á Facebook-síðu lögreglunnar á Suðurlandi. Þar segir að þegar lögregla kom á vettvang voru vegfarendur sem leið höfðu átt framhjá bænum og nágrannar sem höfðu orðið eldsins varir komnir íbúunum til aðstoðar. Útihúsin urðu alelda á skömmum tíma en viðbragðsaðilum tókst að bjarga flestum kindunum úr húsinu.
„Nú stendur sauðburður sem hæst og voru kindur komnar að burði hýstar í húsunum. Íbúar með aðstoð vegfarenda náðu að bjarga flestum kindunum úr húsunum en að minnsta kosti þrjár kindur og fjögur nýfædd lömb drápust. Slökkvistarf gekk vel og tók um 90 mínútur en það gekk fyrst út á að verja íbúðarhúsið,“ segir í færslunni. Í henni er viðbragðsaðilum þakkað fyrir snögg viðbrögð.
Eldsupptök eru ókunn en rannsókn stendur yfir.
Athugasemdir