Góðverk fyrir ekkju með ung börn: „Takk fyrir gleðina sem ríkir hjá mínum börnum núna“

Örvar Þór Guð­munds­son, sem stofn­aði góð­gerð­ar­sam­tökin Samferða árið 2016 og situr í stjórn þeirra segir frá röð góð­verka til ein­stæðrar móður með tvö ung börn, og verður sagan að telj­ast sú besta sem lesa má í dag.

Á þriðju­dags­kvöldið barst ábend­ing til sam­tak­anna um unga ekkju með tvö ung börn sem átti 17 þús­und krónur til að lifa af út mán­uð­inn. Maður kon­unnar lést í fyrra. „Þessi ábend­ing snerti okkur mikið,“ segir Örvar Þór. „Það sem meira er, sonur hennar fjög­urra ára er með mikla sjón­skekkju og var nýbú­inn að brjóta óvart ódýr gler­augu sem hann átti.“

Örvar Þór Guð­munds­son Mynd / Facebook

Örvar Þór ákvað að fara óhefð­bundna leið í gær og mælti sér mót við fjöl­skyld­una í Kringl­unni í gler­augna­versl­unni Prooptik.

„Ég ræddi við yfir­mann í þeirra verslun og útskýrði stöðu mála. Það stóð ekki á þeirri verslun. Versl­unin gaf barn­inu vönd­uð­ustu gler­augun í búð­inni sem eru óbrjót­an­leg og kosta um 60.000 krónur,“ segir Örvar Þór.

Því var næst farið í fata­verslun í Kringl­unni. Þar fékk móðir að versla boli, sokka, nær­föt og skó fyrir börnin og fyrir sig líka. „Þá var þessu ekki lokið. Ég hafði sam­band við fram­kvæmda­stjóra hjá Cintamani. Eftir að hafa útskýrt fyrir honum stöðu mála þá stóð ekki á þeim heldur. Áttum að koma strax í verslun þeirra inn í Garðabæ. Þar tók hann á móti okkur með sumar og vetr­ar­föt á bæði börnin hennar ásamt úlpu á móðir. Pakki upp á 250.000 krónur.“

Lagði einnig inn á reikning móðurinnar

Örvar Þór kvaddi síðan tár­vota móð­ur­ina og börnin hennar. „Ekki með faðm­lagi (þar sem við hlýðum Víði og virðum 2 metra regl­una) heldur hlý­legu brosi,“ segir Örvar Þór, sem lét síðan móð­ur­ina vita að hún ætti fyrir mat út mán­uð­inn, því hann hefur lagt inn á hana frá Samferða 83 þús­und krónur.

„Hún á því til pen­ing fyrir mat fyrir sig og börnin út þennan apríl mánuð og getur mögu­lega gert eitt­hvað skemmti­legt fyrir börnin sín líka,“ segir Örvar Þór og þakkar Prooptik og Cintamani fyrir góð­vild þeirra.

Móðirin unga, sem kýs að njóta nafn­leyndar, sendi Örvari Þór síðan skila­boð og þakk­aði kær­lega fyrir:

„Sæll Örvar. Mig lang­aði að þakka þér inni­lega fyrir allt sem þú gerðir fyrir litlu fjöl­skyld­una mína í gær. Gleðin hjá krökk­unum er ólýs­an­leg. Allt sem þau fengu voru hlutir sem ég hef þurft að láta sitja á hak­anum þrátt fyrir að það vant­aði nauð­syn­lega. Fór líka í gær og versl­aði stíg­vél á þau bæði.

Langaði líka að segja þér frá sam­tali milli mín og sonar míns í gær­kvöldi. Hann sagði mér að hann væri alveg viss um að þú værir vinur guðs. Því hann var sko búinn að biðja guð að fá svona úlpu (svarta með loð­kraga). Hann er búinn að biðja um svona úlpu í marga mán­uði en ég hef ekki haft efni á henni. Svo spurði hann mig hvort ég gæti ekki beðið þig að skila til pabba að hann elskaði hann og sakn­aði hans. Því jú hann er alveg viss um að þú ert góð­vinur guðs þannig þetta var svo sjálf­sagt í hans unga huga. Ég held að ég geti aldrei komið alminni­lega í orð þakk­læt­inu sem ég finn fyrir. Og hversu ótrú­lega mikil hjálp þetta var. Takk fyrir okkur og takk fyrir gleð­ina sem ríkir hjá mínum börnum núna.“

Ellefu styrkþegar látnir síðustu 14 mánuði

Örvar Þór segir síðan frá því að Samferða hafi í flestum til­vikum síð­ustu ár styrkt þá allra veik­ustu hér á landi.

„Alltaf er um að ræða fjár­styrk. Oft er þetta fólk sem er að berj­ast við krabba­mein. Bara á síð­ustu 14 mán­uðum eru 11 ein­stak­lingar látnir sem við höfum verið að styrkja. Fólk á aldr­inum 25-70 ára. Yndisleg kona sem við höfum styrkt mikið síð­ustu ár tap­aði sinni bar­áttu á mánu­dags­kvöldið og kvaddi okkar jarð­vist – góða ferð elsku Begga,“ segir Örvar Þór.

„Ég líkt og Martin Luther King á mér draum. Ef allir Íslend­ingar myndu deila og styrkja okkar sam­tök um 500 krónur í dag eða á næstu mán­uðum þá getum við auð­veld­lega haldið okkar starfi áfram næstu 10 árin í það minnsta. Getum hjálpað mörg hund­ruð fjöl­skyldum á hverju ári. Það þarf ekki meira til. Bara 500 kall. Ertu til í það?,“ segir Örvar Þór.

Þeir sem vilja styrkja starf Samferða geta lagt inn á
reikn­ingur 0327-26-114
kennitala 651116-2870

Einnig er hægt að hringja í 900 númer Samferða:
907-1081 – gefur 1000 krónur
907-1083 – gefur 3000 krónur
907-1085 – gefur 5000 krónur
907-1090 – gefur 10000 krónur

Allir ein­stak­lingar sem starfa í stjórn Samferða gefa vinnu sína, auk þess er eng­inn kostn­aður. „Sökum þess gefum við alltaf allt sem safn­ast,“ segir Örvar Þór. Ábend­ingar og/eða fyr­ir­spurnir má senda í gegnum Facebook-síðu Samferða.