Magn blautklúta sem rata ofan í klósettið margfaldaðist í mars. Magnið var svo mikið að það skapaði álag á búnað hreinsistöðva fráveitu og hreinsistöð fráveitu við Klettagarða var þá óstarfhæf. Þá dældist óhreinsað skólp út í sjó.
Veitur sendi frá sér tilkynningu um miðjan marsmánuð og var fólk minnt á að hreinsiklútar og annað rusl ætti ekki að fara í klósettið og að mikil vinna og kostnaður færi í að hreinsa dælur.
Í fyrirspurn Mannlífs um hvort að það hafi dregið úr því að fólk sé að henda blautklútum í klósettið eftir að Veitur vöktu athygli á málinu segir Ólöf Snæhólm Baldursdóttir, upplýsingafulltrúi Veitna að ekki hafi verið gerðar neinar formlegar mælingar.
Hún segir þó að starfsfólk hreinsistöðvanna segi henni að útlit sé fyrir að magnið af blautklútum hafi minnkað undanfarna daga en að því miður berist ennþá gífurlegt magn af blaut- og sótthreinsiklútum og öðru rusli í kerfið. „Því miður,“ segir Ólöf og nýtir tækifærið til að hvetja fólk til að láta af þessum ávana, að fleygja blautklútum í klósettið. „það skiptir okkur öll máli að fráveitan sé í lagi.“
Athugasemdir