Ásmundur Einar Daðason, félags- og barnamálaráðherra, veitti í dag styrki af safnliðum fjárlaga til 33 félagasamtaka og nam heildarfjárhæð styrkja alls tæplega 140 milljónum króna. Styrkjum af safnliðum fjárlaga hefur verið úthlutað árlega um langt skeið en þeir eru veittir til félagasamtaka sem vinna að verkefnum á sviði félags- og velferðarmála.
Í ár var lögð sérstök áhersla á verkefni sem lúta að málefnum barna og fjölskyldna. Meðal þeirra eru verkefni á vegum Barnaheilla, Rauða krossins á Íslandi, KFUM og KFUK og styrktarfélags lamaðra og fatlaðra. Einnig voru veittir styrkir til verkefna sem heyra undir önnur málefnasvið félags- og barnamálaráðherra sem lúta m.a. að málefnum fatlaðs fólks, fátækt, geðheilsu, félagslegri virkni og ofbeldi.
Drekaslóð, Geðhjálp, Landssamtökin Þroskahjálp og Vímulaus æska-foreldrahús fá hæstu styrkina í ár.
Í ávarpi sínu við úthlutun styrkjanna á Nauthóli í dag talaði ráðherra um það verðmæta starf sem frjáls félagasamtök sinna á degi hverjum í þágu samfélagsins, einkum þau sem vinna að að því að gæta hagsmuna þeirra sem standa höllum fæti í samfélaginu. Þá sagði ráðherra mikilvægt að til staðar sé sjóður til þess að sækja í, bæði til þess að geta viðhaldið góðum verkefnum en ekki síst til þess að geta þróað ný verkefni. „Styrkirnir fela í sér mikil tækifæri fyrir frjáls félagasamtök. Frjáls félagasamtök eru afar mikilvæg samfélagi okkar og þróa oft nýjar og góðar hugmyndir eða útfærslur á eldri hugmyndum sem við tileinkum okkur öll í kjölfarið. Frjáls félagasamtök gegna oft burðarhlutverki í ýmsum málaflokkum sem varða heilsu og velferð fjölskyldna á Íslandi og nauðsynlegt er að viðurkenna það góða starf sem þar fer fram og veita því brautargengi“ sagði Ásmundur Einar.
Við úthlutanir styrkjanna síðustu ár er orðin hefð fyrir því að fá valda styrkþega til þess að kynna verkefnin sem þau hljóta styrk fyrir. Að þessu sinni voru kynnt tvö verkefni sem hafa verið í gangi um árabil og reynst vel þeim sem á hafa þurft að halda. Annars vegar er um ræða sumarbúðir KFUM og KFUK fyrir börn með sérþarfir og hinsvegar Systkinasmiðjuna, sem býður upp á sérstök námskeið fyrir systkini barna með sérþarfir.
Stjórnarráðið
Allir reikningar ríkisstofnana og ríkissjóðs orðnir rafrænir
Sektir eða fangelsi við broti á reglum um sóttkví
Katrín skipar í kærunefnd jafnréttismála
Arndís Soffía skipuð sýslumaður í Vestmannaeyjum
Fimm vilja dómarastöðu við Hæstarétt
Athugasemdir