Góð vika – Heimssýn
Meðlimir Heimssýnar eru vafalaust húrrandi hressir þessa dagana þar sem lávarðadeild breska þingsins samþykkti í vikunni frumvarp sem ætlað er að lögleiða útgöngusamning Bretlands við Evrópusambandið. Boris Johnson, forsætisráðherra Bretlands, sagði Brexit vera svo gott sem í höfn. Þetta eru vitaskuld gleðitíðindi fyrir hið íslenska félag sjálfstæðissinna sem hefur þegar boðað til hópferðar til London til að samfagna útgöngu Breta úr ESB. Tengiliður vegna ferðarinnar er enginn annar en Gunnlaugur Ingvarsson, formaður Frelsisflokksins, sem leggst gegn fjölmenningu á Íslandi, þannig að ljóst er að þeir sem skella sér verða í yndislegum félagsskap. Já, sleppið Eurovision-ferðinni í ár, Comic Con og því öllu, þetta ævintýri toppar allt, eða eins og segir í auglýsingu félagsins, þá er hér „um heimssögulegan viðburð að ræða“.
Slæm vika – strákarnir okkar
Það hafa sannarlega skipst á skin og skúrir hjá íslenska karlalandsliðinu í handbolta á síðustu dögum. Þrátt fyrir tap gegn Ungverjum og Slóveníu á EM fór liðið vel af stað á mótinu með sigri á Rússlandi, Portúgal og sjálfum ríkjandi heims- og Ólympíumeisturum, Dönum. Í þessari viku gekk hins vegar allt á afturfótunum. Fyrst tapaði liðið fyrir Noregi þar sem martraðarbyrjun varð liðinu að falli. Sagðist Guðmundur Guðmundsson þjálfari vera miður sín eftir leikinn og ljóst að Ólympíuvonin var orðin heldur veik. Ekki tók betra við þegar liðið mætti Svíum. Fátt gekk upp, hvort sem var í vörn eða sókn og tapaði liðið með sjö marka mun í lokaleik sínum á mótinu. Þótt liðið hafi komist í milliriðil, sem er afrek, og vissulega átt stórkostlega spretti verður að segjast eins og er að þetta var vægast sagt svekkjandi endir á góðri byrjun. Meira svona búhú en HÚH.
Athugasemdir