„Við hvetjum gesti til að klæða sig eftir veðri, en við lista­menn­irnir munum samt alls ekki gera það,“ segir fjöl­lista­konan Margrét Erla Maack um við­burð­inn Port­konu­ka­bar­ett sem hald­inn verður í port­inu fyrir aftan Vín­stúk­una Tíu Sopa á morgun, föstu­dag.

Spurð nánar út í við­burð­inn lofar Margrét góðri skemmtun og fjöl­breyttum atriðum. Þau sem koma fram ásamt Margréti eru þau Nadia Semichat, Axel Diego, Jón Sigurður Gunn­ars­son, Sindri Diego og Jellyboy the Clown. Margrét segir Jellyboy vera besta sverð­gleypi New York borgar.

Jón Sigurður. Mynd / Gallery Und­ir­heimar

Margrét segir Jellyboy vera besta sverð­gleypi New York borgar. Mynd / Gallery Und­ir­heimar

Um 40 til 50 manns kom­ast að á við­burð­inum og Margrét segir að smá „leyni­stemmn­ing” munu ríkja á honum. „Þetta verður bland í poka og það sem er svo skemmti­legt við svona sam­vinnu­verk­efni á milli lista­manna og veit­inga­manna er að það laðar að fjöl­breyttan hóp áhorf­enda. Við munum bjóða upp á alls konar skemmtun, sirkus, burlesque, eld, og sitt­hvað fleira – með full­orð­ins­bragði.“ segir Margrét.

Hún segir miða­fram­boðið vera tak­markað en er viss um að annar Port­konu­ka­bar­ett verði hald­inn seinna í sumar. „Ég lofa að þetta verður haldið aftur í sumar því það er alveg ljóst að færri munu kom­ast að en vilja. Þetta er okkar leið til að lífga upp á mið­bæ­inn í sam­starfi við Sum­ar­borg­ina.“

Nadia Semichat er í hópi þeirra sem koma fram á við­burð­inum. Mynd / Kaspars Bekeris

Margrét hefur ekki miklar áhyggjur af veðr­inu á föstu­dag­inn. „Íslenska veð­ur­spáin segir að það verði rign­ing en sú norska spáir sól. Þannig að það getur brugðið til beggja vona. En það má alveg vera rign­ing, ég meina, fólk er til­búið að fara í úti­legur í íslenskri nátt­úru og sitja í rign­ing­unni tímunum saman en þolir svo ekki rign­ingu í mið­bænum,“ segir Margrét og hlær. „Við erum alla­vega ekki með neinar áhyggjur af veðr­inu.“

Hún mælir með að fólk klæði sig eftir veðri hvernig sem það verður og njóti svo skemmt­un­ar­innar.

Port Vín­stúkunnar verður opnað klukkan 19.00 á föstu­dag­inn og þá verður hægt að kaupa mat og drykk fyrir sýn­ing­una sem hefst kl. 20.