„Risið þessa dag­ana er ekki því að kenna að við opn­uðum landa­mæri, það er ekki fólki að kenna sem er að leita eftir alþjóð­legri vernd eða ferða­mönnum,“ segir Gylfi Þór Þor­steins­son, umsjón­ar­maður sótt­varn­ar­húsa í færslu á Facebook-síðu sinni. Segist Gylfi Þór fá það fólk til sín.

„Ef ferða­maður er sýktur við landa­mæri, þá kemur hann til mín. Ef um mann­eskju sem er í leit að aðþjóð­legri vernd (flótta­maður) er að ræða þá kemur við­kom­andi til mín um leið og komið er til lands­ins,“ segir Gylfi Þór og bætir við að eng­inn flótta­maður hafi borið með sér smit og þeir ferða­menn sem hafi greinst á landa­mær­unum hafi ekki komið sér í sam­band við Íslend­inga.

Segir hann sára­fáa ferða­menn hafa fengið nei­kvætt sýni á landa­mær­unum og síðar jákvætt, ef hann muni rétt sé það einn ein­stak­lingur, sem lík­lega hafi smit­ast hér á landi.

„Þeir sem hafa borið smit með sér milli landamæra eru Íslend­ingar, fólk sem vill kom­ast heim. Við erum í bar­áttu, lík­lega stærsta stríði sem við höfum tekið þátt í síðan í Þorskastriði,“ segir Gylfi Þór enn fremur. „Við erum ekki í seinni bylgju, við erum að takast á við Covid og við munum halda því áfram í tölu­verðan tíma. Við sigrum ekki með því að leita söku­dólga, þar sem þeir eru ekki. Við sigrum með því að standa saman, saman sem ein/n. Hættum að leita að söku­dólgum, það er engin sekur. Leitum frekar að lausnum, leitum að því góða í okkur því án okkar, er ekk­ert við.“

Fjögur far­sótt­ar­hús eru í land­inu, tvö við Rauð­ar­ár­stíg í Reykja­vík, eitt á Akureyri og eitt á Egils­stöðum. Sam­an­lagt dvelja þar á fjórða tug Íslend­inga og útlend­inga í ein­angrun og sótt­kví, lang­flestir  í Reykja­vík. Ein fjöl­skylda er í far­sótt­ar­hús­inu á Akureyri eftir að einn fjöl­skyldu­með­lima greind­ist með veiruna þar í gær.