Hvorki tals­menn Icelandair flug­fé­lags­ins né for­maður Félags íslenskra atvinnu­flug­manna, FÍA, vilja tjá sig um gagn­rýni á fram­komu þeirra við flug­freyjur félags­ins í harðri kjara­bar­áttu þeirra við flug­fé­lagið. Flugmenn bæði í Evrópska Flutn­inga­manna­sam­band­inu og Norræna Flutn­inga­manna­sam­band­inu hafa sagt fram­komu stjórn­enda og flug­manna Icelandair gagn­vart flug­freyjum til hábor­innar skammar.

Bæði flug­manna­fé­lögin sendu frá sér yfir­lýs­ingar þar sem upp­sagnir Icelandair á öllum flug­freyjum félags­ins voru harð­lega gagn­rýnt. Það var ekki síður gagn­rýnt að félagið ætl­aði að skipta þeim út fyrir flug­menn sem sam­þykktu að ganga í þeirra hlut­verk tíma­bundið sem svo­kall­aðir örygg­is­liðar. Að flug­menn Icelandair hafi sam­þykkt að ganga í störf flug­freyj­anna er þeim til minnk­unar að mati starfs­bræðra þeirra á norð­ur­lönd­unum og í Evrópu.

Mannlíf óskaði við­bragða hjá Icelandair við gagn­rýn­inni en félagið seg­ist ekki telja ástæðu til að svara þess­ari gagn­rýni. „Varðandi fyr­ir­spurn þína, þá höfum við ekki séð ástæðu til að bregð­ast við þessu sér­stak­lega,“ segir Ásdís Ýr Pét­urs­dóttir, sam­skipta­stjóri Icelandair, í svari til Mannlíf.

Mannlíf hefur einnig leitað við­bragða hjá Jóni Þór Þor­valds­syni, for­manni FÍA, en án árang­urs.

Jón Þór Þor­valds­son, for­maður FÍA. Mynd / Skjáskot RÚV