Hander Maria de la Rosa, fórnarlamb hópárásar í Bankastræti um síðustu helgi, segist ótrúlega feginn að hafa sloppið lifandi frá árásinni. Hann segir að árásarmennirnir hafi reynt að stinga hann í höfuðið en hann hafi náð að koma hönd sinni fyrir þannig að hnífurinn rauf þar slagæð. Samkvæmt heimildum Mannlífs eru árásarmennirnir af albönskum uppruna og hafa unnið sem dyraverðir fyrir skemmtistaði í miðborginni.
Hander hefur verið búsettur á Íslandi síðastliðin fjórtán ár eða frá því hann kom hingað frá Dominíska lýðveldinu sjö ára að aldri. Hann er í sambandi með íslenskri konu og telur ljóst að húðlitur sinn, en hann er dökkur á hörund, sé orsök átakanna. „Þetta byrjaði þannig að húðlitur minn var orsökin en þeir eru líka að ráðast á Íslendinga. Meðal annars spörkuðu þeir í og rotuðu einn sem reyndi að hjálpa mér,“ segir Hander.
Þetta er ekki í fyrsta sinn sem þessi sami hópur karlmanna ræðst á Hander. Í nóvember síðastliðnum kjálkabrotnaði hann við árás og þá árás kærði hann til lögreglu. Hópárásin um síðustu helgi varð eftir að hann neitaði hópnum um að draga kæruna tilbaka. Þegar mennirnir sáu til Hander í miðbænum, þar sem hann var að fagna afmæli vinar síns, réðust þeir á hann. „Ég var búinn að kæra þennan sama hóp eftir að meðlimir hans réðust að mér með kylfum og ég lá á spítala í nokkra daga. Þessi árás snerist um að ég dragi kæruna tilbaka, þannig byrjaði þetta. Ég sagði þeim að ég myndi ekki gera það og þá var bara ráðist á mig,“ segir Hander.
Ég er hræddur við að fara út úr húsi af ótta við að þetta gerist aftur
Í myndböndum sem sýnd hafa verið af átökunum má sjá Hander liggjandi í götunni þar sem hópur manna sparkar í hann. Eins og áður sagði var Hander stunginn í handlegginn og slagæð fór í sundur. Hann fór í stóra aðgerð til að loka henni en hann þurfti að fara aftur á sjúkrahús í gær eftir að blæða tók úr skurðinum. Hann er sannfærður um að stungan var ætluð í höfuð hans. „Þeir reyndu að stinga mig í hausinn en ég náði að setja hendina fyrir. Vinir mínir reyndu að hjálpa mér og sem betur fer kom fólk líka sem náði að stoppa þetta þannig að ég komst á spítala. Ég var búinn að missa mikið blóð og ég tel mig ótrúlega heppinn að vera á lífi,“ segir Hander.
Læknar telja ólíklegt að Hander Maria fái aftur fullan mátt í handlegginn eftir stunguna.
Lögreglan á höfuðborgarsvæðinu hefur látið hafa eftir sér að slagsmálin gætu hafa verið uppgjör milli tveggja hópa. Sagt er að fjórir séu með stöðu sakbornings en enginn værið færður í gæsluvarðhald. Frásögn Hander gefur til kynna að þarna sé vissulega uppgjör á ferðinni, en það er uppgjör ofbeldismanna gegn honum sem reyndu að berja hann til hlýðni svo kæra um fyrra ofbeldi yrði dregin tilbaka.
Þegar Hander lá á sjúkrahúsi til aðhlynningar var hann yfirheyrður af lögreglu sem hann vonar að skili sér í ákæru á hendur árásarmönnunum. Aðspurður hvort hann fái vernd hjá yfirvöldum þá segist hann ekki hafa fengið tilkynningu um neitt slíkt. „Ég var stunginn í slagæð og nú fæ ég kannski bara 70-80 prósent af hreyfingu handarinnar tilbaka. Ég var virkilega hræddur á meðan á þessu stóð og ég er hræddur við að fara út úr húsi af ótta við að þetta gerist aftur. En ég er umfram allt þakklátur fyrir að vera á lífi.“
Myndband af árásinni má sjá hér fyrir neðan. Við vörum við að myndbandið gæti valdið óhug.
Athugasemdir