Icelandair og hið nýja WOW rætt samstarf síðustu vikur

Icelandair Group lauk í dag hluta­fjár­út­boði sínu þar sem mark­mið fyr­ir­tæk­is­ins var að safna 20 millj­örðum króna í nýju hlutafé. Samkvæmt heim­ildum Mannlífs var áhugi fjár­festa á útboð­inu umfram vænt­ingar umsjón­ar­að­ila, Lands­banka og Íslands­banka. Allir stærstu líf­eyr­is­sjóðir lands­ins munu hafa sýnt útboð­inu áhuga og skráð sig fyrir nýjum hlutum. Þá var áhugi minni fjár­festa og almenn­ings einnig umfram vænt­ingar.

Icelandair mun á morgun til­kynna form­lega um nið­ur­stöðu útboðs­ins og þá umfram­eft­ir­spurn sem stað­festar heim­ildir Mannlífs herma að hafi verið. Umsjón­ar­að­ilar útboðs­ins hafa heim­ild til að stækka útgáfu nýrra hluta um þrjá millj­arða króna og búast má fast­lega við því að það verði gert.

Michelle Roosevelt Edw­ards búin að eiga í viðræðum við Icelandair

Greint var frá því í dag hjá mbl.is að Michelle Roosevelt Edw­ards, at­hafna­kon­an sem keypti eign­ir WOW air úr þrota­búi flug­fé­lags­ins hafi skráð sig fyrir sjö millj­örðum króna í hluta­fjár­út­boð­inu í dag. Sömu heim­ildir herma að Edwards von­ist til að halda á 25 pró­senta eign­ar­hlut að loknu útboð­inu.

Samkvæmt heim­ildum Mannlífs hefur Edwards átt í óform­legum við­ræðum við stjórn­endur Icelandair und­an­farnar vikur og rætt mögu­lega sam­vinnu á milli Icelandair og félags í hennar eigu sem keypt hafi eignir úr þrota­búi WOW air.

Stóð ekki í skilum um umsamdar greiðslur til þrotabús WOW air

Edwards festi kaup á völdum eignum úr þrota­búi WOW air í júlí 2019 og var síðar nokkuð yfir­lýs­ingaglöð í umfangs­miklu við­tali við Við­skipta­Mogg­ann á þeim tíma. Þrátt fyrir yfir­lýs­ingar um millj­arða í rekstr­arfé hins nýja félags var kaup­unum síðar rift þar sem Edwards gat ekki staðið skil á greiðslum vegna kaup­samn­ings félags Edwards og þrota­bús­ins en sú greiðsla átti að skipt­ast í þrennt og var alls um 180 millj­ónir króna. Síðar boð­aði Edwards til kynn­ing­ar­fundar þar sem sam­komu­lag hafi náðst á milli einka­hluta­fé­lags hennar, USAerospace Associates LLC og skipta­stjóra þrota­bús WOW Air á öllum eignum sem til­heyrðu WOW vöru­merk­inu.

Í ljósi við­skipta­sögu Edwards hér á landi verður að telj­ast lík­legt að umsjón­ar­að­ilar útboðs­ins biðji athafna­kon­una um stað­fest­ingu á greiðslu­getu áður en úthlutun til hennar getur átt sér stað.