Leið­sögu­mað­ur­inn Steinar Sveins­son telur það mildi að honum hafi ekki verið gert mein eftir nærri klukku­tíma sam­skipti sín við Neyð­ar­línun meðan hann stóð sjálfur yfir inn­brots­þjófi. Á end­anum gafst Steinar upp og leyfði þjófnum að fara.

Steinar lýsir reynslu sinni í færslu á Facebook og tengir hana við nýlegan frétta­flutn­ing af hönn­un­ar­galla í tölvu­kerfi neyð­ar­lín­unar sem olli því að sím­tal um eld í hús­bíl skil­aði sér ekki til lög­reglu. Þá gafst inn­hringj­and­inn upp án þess að nokkur hjá lög­reglu svar­aði og lög­reglan fékk ekki að vita af mál­inu fyrr en dag­inn eftir. Í brun­anum lést maður og hundar hans. Steinar fékk heldur aldrei sam­band við lög­reglu í sínum sam­skiptum við Neyð­ar­lín­una.

„Ég stóð eitt sinn yfir inn­brots­þjófi og hringdi í Neyð­ar­lín­una. Gaf upp nafn og heim­il­is­fang og lýsti aðstæðum sem mér þóttu nógu alvar­legar til að ímynda mér að fljótt yrði brugð­ist við. Mér er sagt að hinkra aðeins og slít þá sím­tal­inu enda í aðstæðum þar sem ég tel mig þurfa að hafa athygl­ina vak­andi. Aldrei kemur lög­reglan og ég hringi aftur. Sama scenario og aldrei kemur lög­reglan. Ég hringi í þriðja sinn og kvarta dáldið og þá kom loks skýrt fram hjá Neyð­ar­lín­unni að ,,hinkr­aðu aðeins” þýðir að flytja á sím­talið til lög­regl­unnar,” segir Steinar sem furðar sig á því að gert væri ráð fyrir að hann þekkti vinnu­ferli Neyð­ar­lín­unnar. 

„Spurði mig eftir á af hverju var þá verið að fá allar upp­lýs­ingar frá mér þar ef átti hvort eð er að flytja sím­talið annað, og spurði mig af hverju mál­inu var ekki fylgt eftir við lög­reglu og hún send á stað­inn þegar sam­talið slitnar, ég hefði getað verið sleg­inn niður eða gert mein? Hálf fannst mér þetta und­ar­legt allt og óvið­búið að eiga við fólk í erf­iðum aðstæðum. Þetta tók allt upp undir klukku­tíma, ég kynnt­ist inn­brots­þjófinum og lét hann að lokum rölta bara. Þetta er gott að hafa í huga en vænt­an­lega ganga flest mál vel upp hjá Neyð­ar­lín­unni og hlut­irnir í góðu ferli því ekki heyrir maður mikið af svona upp­á­komum bless­un­ar­lega,” segir Steinar.