Innbrotsþjófur var handtekinn í Árbænum í gær upp úr miðnætti er hann reyndi að brjótast inn í hús. Þetta segir í dagbók lögreglunnar á höfuðborgarsvæðinu og kemur þar fram að sást til mannsins í miðri tilraun. Þá var verknaðurinn tilkynntur til lögreglu og var innbrotsþjófurinn enn á staðnum þegar lögregluþjónar komu á staðinn, í haldi þess sem tilkynnti brotið og annars manns. Þeir höfðu handsamað manninn við innbrotið og biðu eftir komu lögreglu. Innbrotsþjófurinn gisti fangaklefa í nótt.
Þá voru fjórir ökumenn einnig stöðvaðir í gærkvöld og í nótt sem grunaðir voru um akstur undir áhrifum áfengis eða fíkniefna. Fimmti bílstjórinn sem grunaður er um akstur undir áhrifum lenti í umferðaróhappi. Sá var vistaður í fangaklefa.
Segir einnig í tilkynningu lögreglunnar að mikið hafi verið að gera í sjúkraflutningum hjá Slökkviliði höfuðborgarsvæðisins síðasta sólarhringinn. Alls þurftu sjúkraflutningamenn að fara í 130 sjúkraflutninga, þar af ellefu vegna COVID.
Athugasemdir