„Ég sé stundum að heili fólks er að springa þegar ég tala íslensku því það passar ekki inn í formið. Ég veit að þetta er ekki endi­lega illa meint en ég verð stundum pirruð.“

Þetta segir Fida Abu Libdeh í opin­skáu helg­ar­við­tali við Björk Eiðs­dóttur sem birt­ist í helg­ar­blaði Frétta­blaðs­ins í dag, en Fida flutt­ist til Íslands frá Palest­ínu þá sextán ára að aldri og lauk námi við Háskóla Íslands í orku- og umhverf­is­tækni­fræði.

Loka­verk­efnið vann hún ásamt Burkna Pálssyni, skóla­fé­laga sínum og skoð­uðu þau áhrif kís­ils á manns­lík­am­ans og hreins­un­ar­að­ferðir á kísli. Í kjöl­farið stofn­uðu skóla­fé­lag­arnir Geo Silica árið 2012, sem í dag fram­leiðir nátt­úru­leg íslensk fæðu­bót­ar­efni og hefur sett á markað fimm vörur.

Þarf að hefja flest samtöl á því hvaðan hún er hvort hún tali íslensku

Fyr­ir­tækið er í dag metið á 700 millj­ónir króna en Fida segir að því ofar sem hún klífi met­orða­stig­ann í þjóð­fé­lag­inu verði fyrir fram ákveðnar hug­myndir og for­dómar sem hún mætir því meiri. „Ég er í stjórn sam­taka sprota­fyr­ir­tækja og UN Women og bauð mig fram á dög­unum sem for­mann Félags kvenna í atvinnu­líf­inu.“

„Who is the owner of the company?“

Fida segir frá eft­ir­minni­legu kvenna­kvöldi þar sem þau voru komin til að kynna vör­urnar og eig­in­leika þeirra þegar þrjár konur hafi gefið sig á tal við hana, hrósað vör­unum og innt Fidu eftir því hver ætti fyr­ir­tækið. „Ég segi að ég eigi það – þetta sé spin off frá loka­verk­efni mínu í háskóla. Hún seg­ist vita það að þaðan hafi hug­myndin komið en ítrekar spurn­ingu sína um hver eigi fyr­ir­tækið.

Fida segir atvikið hafa verið auð­mýkj­andi og að henni hafi síst verið gleði í huga þegar konan bar upp spurn­ing­una um raun­veru­legt eign­ar­hald fyr­ir­tæk­is­ins á kvenna­kvöldi Geo-Silica. „Þvílíka nið­ur­læg­ingin fyrir mig, get­urðu ímyndað þér hvernig þér myndi líða?“

Aðspurð segir Fida þó að lít­ill munur sé á palest­ínskum og íslenskum konum, en palest­ínskar konur eru þekktar bar­áttu­konur hafa tekið mik­inn þátt í frels­is­bar­áttu Palest­ínu. Helsti mun­ur­inn sé sá að íslenskir karl­menn standi með kon­unum sínum. „Þar liggur mun­ur­inn,“ segir Fida jafn­framt.

Helg­ar­við­talið við Fidu Abu Libdeh má lesa HÉR