Strekkingsnorðanátt, rigning og slydda og snjókoma til fjalla. Þetta eru svör Veðurstofu við spurningum sólarþyrstra um veðurhorfur næstu daganna. Lítilsháttar hret segja veðurfróðir þó ekki merkja smávetur þó hálfleiðinlegt verði vegna næðings. Þessi spá gildir þó aðeins um bláhelgina en vindasamt og vott hefur sumarið verið og glittir í snævi þakta fjallstoppa á Vestfjörðum og víðar.
„Lægðarbrautin er akkúrat yfir okkur núna“
„Regnjakki fyrir norðan og lopapeysa undir,“ eru heilræði Teits Arasonar veðurfræðings. Laugardagur, sem til allrar hamingju er á morgun, vísar til lukku eins og vísan gamla kveður á en þurrt verður fram eftir degi og glittir í sól hér og þar fyrripart. Bæta mun í vind seinnipart dags og verður farið að rigna á landinu sunnanverðu þegar að kvöldverði kemur.
Snjór í byggð í Árneshreppi: „Þetta verður gott sumar þegar hretinu slotar“.
Hlýjast verður á höfuðborgarsvæðinu og Kirkjubæjarklaustri en spáin lofar 11 gráðu hita beggja vegna. Kaldast verður á Akureyri og nærsveitum en áætlaður hiti er 8 gráður. Þá má reikna með krapi og snjóþekju á sumum fjallvegum á norðanverðu landinu nú um helgina og því full ástæða fyrir ferðalanga að aka varlega um þjóðvegi landsins.
Norðanstrekkingur sá sem Teitur veðurfræðingur spáir réttilega um hefur komið niður víðsvegar um landið en allhvass vindurinn verður á bilinu 10 18 metrar á sekúndu. Eigendur farartæja sem eru viðkvæm fyrir vindi ættu þannig að tryggja hjólhýsi og húsbíla nú um helgina og kanna aðstæður á vefsíðu Vegagerðarinnar áður en haldið er af áfram á þjóðvegum.
„Gránar í fjöll fyrir norðan á sunnudag“
„Það er svona hálfur dagur sem verður góður,“ segir Teitur veðurfræðingur og er þar að fjalla um veðurspá laugardagsins 12. júní.
„Já, fólk ætti eiginlega að drífa sig út fyrripartinn,“ ráðleggur veðurfræðingurinn jafnframt og kulsæknum því vænlegast að læðast innandyra frá kvöldverðartíma. „Það er nú bara rigning um allt land á sunnudag og aftur fer að grána í fjöll fyrir norðan á sunnudag,“ segir Teitur jafnframt. „Við erum í miðri lægð núna, en það er engin ástæða til að ætla að svona haldi áfram í allt sumar. Lægðarbrautin er akkúrat yfir okkur núna eins og hún er stundum á veturna. Við sjáum þetta oft þegar stormarnir koma í röðum og svo er rólegra á milli. En núna í júní er lægðargangurinn rigning og leiðinlegur vindur fyrir árstímann.“
Athugasemdir