Auglýst eftir ofvirkum í jarðvinnu: „Senda ADHD greiningu með atvinnuumsókn“

„Okkur er alvara og á þeirri skoðun að þetta er besta fólkið,“ svarar Gísli Elí Guðnason, eig­andi Hellu­list í Mos­fellsbæ og ábyrgð­ar­maður einkar skemmti­legrar atvinnu­aug­lýs­ingar sem nú blasir við á starfa­torg­inu Albert. Fyr­ir­tækið sér­hæfir sig í jarð­vinnu, hellu­lögn og yfir­borðs­frá­gangi og aug­lýsti nú í vor eftir verka­manni í ýmis störf tengd jarð­vinnu.

Athygli vekur að ein­stak­lingar með ADHD eru hvattir til að sækja um starfið og segir Gísli ekki nema von, starfið sé fjöl­breytt og feli í sér tals­vert mikla ferð og athafnir. „Ég er nú búinn að vera í þessum bransa í tutt­ugu ár, en þetta er svo rosa­lega fjöl­breytt starf. Sú fjöl­breytni hentar mjög vel mönnum sem eru með ADHD“.

Ofvirkir, að sögn Gísla Elí, eru oft besta starfs­fólkið. „Já, ég held það. Ég er sjálfur með ADHD og þetta fún­kerar mjög vel. Við erum á svo mörgum stöðum og dag­ur­inn getur sífellt breyst, þú ert að fara að gera eitt­hvað og það getur breyst rétt eftir hádegi. Þá erum við komnir allt annað. Þeir sem eru með ADHD fatta ekki hrað­ann og finnst þetta ekk­ert mál, segja bara já ok! Förum og gerum þetta! Það er kannski helsti styrk­leik­inn“.

Ofvirkir eru ein­dregið hvattir til að sækja um starf verka­manns hjá Hellu­list í sumar – smellið HÉR

Aðlög­un­ar­hæfni, dugn­aður og dríf­andi fram­kvæmdir ein­kenna þannig oft starfs­hætti þeirra sem eru með tauga­röskun á borð við ADHD. „Ég verð minna var við verk­kvíða,“ svarar Gísli léttur í bragði. „Við­brögðin hafa verið mjög góð og já, ein­hverjir hafa bent á þetta,“ segir hann enn­fremur og segir und­ir­tektir þeirra sem hafa rekið augun í orða­lag atvinnu­aug­lýs­ingar á raf­ræna starfa­torg­inu Alfreð hafa farið fram úr björt­ustu vonum.

„Já, flestum þykir orða­lagið geggjað. Það kom í ljós þegar við aug­lýstum starfið á þess­ari síðu. Fólk sendir okkur jafn­vel ADHD grein­ingu sína með umsókn. Það gleður okkur.“

Enn er mögu­legt að sækja um starf verka­manns hjá þjón­ustu­fyr­ir­tæk­inu Hellu­list en áhuga­samir geta skoðað aug­lýs­ing­una sem blasir við á raf­ræna starfa­torg­inu Alfreð. Sem áður sagði eru ofvirkir hvattir til að sækja um, en ADHD þykir þó ein­ungis kostur og er síður en svo skil­yrði ef ætl­unin er að hreppa fjöl­breyti­legt sum­ar­starf við jarð­vinnu, hellu­lögn og yfir­borðs­frá­gang á höf­uð­borg­ar­svæð­inu í ár.