Skipið sem olli stærsta mengunarslysi við Íslandsstrendur

„Það tekur stund að gera svona skip, það eru mörg hand­tök í þessu og mikið nostur,“ segir Ingvar Frið­björn Sveins­son hag­leiks­maður í Hnífsdal.

Dags­dag­lega er Ingvar kall­aður Ingi Bjössi og flestum ókunnur undir fullu nafni. Hann hefur smíðað ótrú­lega magnað líkan af síðu­tog­ar­anum Caesar H226 frá Hull í Englandi.

Hvert smá­at­riði skips­ins er eins og fyr­ir­myndin. Uppsett Granton troll sjó­klárt út í síðu með húðum og öllu sem til­heyrir og bundið fyrir pok­ann.
Spil skips­ins eru öll hreyf­an­leg og virka bæði kúp­lingar og bremsur. Hvert smá­at­riði er á sínum stað. Skipið er 2.8 metrar að lengd. Vírar eru splæstir og þrykk­ingar þar sem þær eiga að vera.
Fólk getur komið við á Dalvegi 12 í Hnífsdal um helgar og fengið að skoða þessa ein­stöku lista­smíð sem heillar alla þá sem til skipa þekkja og ekki síst fólk sem unnir góðu hand­verki.

En hvað varð til þess að Ingi Bjössi smíð­aði breskan tog­ara en ekki til dæmis Pál Pálsson úr Hnífsdal?

„Þetta skip hefur verið mér ofar­lega í huga allt frá því að ég var ungur maður. Skipið strand­aði í apríl 1971 við Arnarnes hérna í Djúpinu í björtu og stilltu veðri. Skip­verjar og útgerð skips­ins afþökk­uðu alla aðstoð. Þremur dögum seinna hafði mikil olía lekið úr skip­inu og fór um allar fjörur og mik­ill fugla­dauði hlaust af. Talið er að ekki færri en 3000 fuglar hafi drep­ist í þessu olíu­baði. Í maí tókst að koma skip­inu af strand­stað og var því lagt við sand­rif á Ísafirði. 1. júní var skipið dregið af stað áleiðis til Englands án þess að nokkuð væri hugað að því hreinsa olíu úr tönkum þess. Mörgum hér vestra fannst þetta vera glanna­legt.

Skipið sökk avo um 40 sjó­mílur vestur af Látra­bjargi og með því um 160 tonn af olíu. Mér hefur alltaf sviðið þetta kæru­leysi enda tel ég þetta vera næst stærsta meng­un­ar­slys við Íslands­strendur, segir Ingi Bjössi.
Hann hefur verið á sjó allt sitt líf og veit því að bera verður virð­ingu fyrir haf­inu og umgengni um það.

Það er bók­staf­lega allt á sínum stað. Mynd aðsend

Nú eru tvö skip kom­inn langt áleiðis í smíðum, bæði skipin eiga sterka teng­ingu við Ísafjörð. Sólborg ÍS 260 sem Ísfirð­ingur hf. eign­að­ist 1951 og var flagg­skip ísfirska flot­ans 732 tonn að stærð. Skipið mark­aði bylt­ingu í atvinnu­lífi bæj­ar­búa.
Júpiter GK 161 var smíð­aður 1925 fyrir Tryggva Ófeigs­son og var í drift fram yfir 1960. Skipið var gert út síð­ustu ár frá Þingeyri og svo Flateyri undir nafn­inu Guð­mundur Júní ÍS 20. Skipið var nær 400 tonn að stærð.

Skipið dag­aði svo uppi í fjör­unni á Suð­ur­tanga sem skjól fyrir slipp­inn og ólust margir árgangar Ísfirð­inga upp við að leika sér þar um borð.
„Ég stefni á að klára nýju skipin að ári og svo kemur í ljós hvað tekur við en ég mun áreið­an­lega smíða fleiri skip. Allt verður þetta til sölu, nokkuð hefur verið spurt um Breska togar­ann bæði hér og líka komið fyr­ir­spurnir frá Hull. Ég veit ekki hvað verður um hann, en hann er til sölu. Nú, ef ein­hvern vantar að láta smíða fyrir sig skip, þá er ég hérna í skúrnum,“ segir völ­und­ur­inn í litla bíl­skúrnum í Hnífsdal