„Þarna er mikið af góðu fólki sem á heiður skilið fyrir að koma félaginu á þennan stað eftir langa og stranga fæðingu. Byggt á fyrri reynslu hefði ég reyndar viljað sjá þau fara mun grimmar í lággjalda stefnuna til að standast aukna samkeppni úr öllum áttum en ég óska þeim alls hins besta og bíð spenntur eftir að sjá framhaldið,“ segir Skúli Mogensen, fyrrverandi forstjóri WOW um hið nýja flugfélag, Play, í viðtali við Víkurfréttir.
Skúli, sem nú stefnir að opnun nýs hótels á Ásbrú, segist vera bjartsýnn fyrir hönd Íslands og ferðaþjónustunnar í heild sinni en setur spurningamerki við farmiðaverð hins nýja flugfélags. Hann er svekktur yfir því að Play bjóði ekki upp á enn lægri verð en raun ber vitni.
„Það er nokkuð ljóst að mikið af þeim erlendu flugfélögum sem hafa „uppgötvað“ Ísland á undanförnum árum munu snúa aftur og ef eitthvað er býst ég við því að framboðið til og frá Íslandi muni ná nýjum hæðum strax næsta sumar með tilheyrandi samkeppni og mjög hagstæðum verðum fyrir neytendur“. Skúli segir hafa verið gaman að fylgjast með Play fara á flug og það að koma af stað nýju flugfélagi sé gríðarlegt afrek. „Svo ekki sé talað um að sækja 8 milljarða í fjármögnun áður en fyrsta flug er farið,” segir Skúli sem veðjar nú á framtíð Suðurnesja.
Athugasemdir