Starfsmaður á leikskólanum Sælukoti í Reykjavík hefur verið sakaður um ofbeldi í garð barns við skólann. María Ösp Ómarsdóttir, leikskólastjóri Sælukots, segir að umrætt atvik hafi átt sér stað áður en hún tók við skólastjórastöðunni um síðustu mánaðamót.
Leikskólinn Sælukot er rekinn af Ananda Marga samtökunum.
Í tölvupósti Maríu til foreldra barna í leikskólanum kemur fram að viðkomandi starfsmaður hafi verið sendur í leyfi; á meðan rannsókn stendur yfir; þá séu skólastjórnendur í samskiptum við Barnavernd og Reykjavíkurborg vegna málsins:
„Það sem skiptir mestu máli er að börnin ykkar séu örugg og hamingjusöm hér í Sælukoti og við munum gera allt sem við getum til að leysa málið eins hratt og hægt er,“ segir í áðurnefndum pósti.
Samkvæmt heimildum Mannlífs er málið ekki á borði lögreglu, enn sem komið er, en samkvæmt sömu heimildum er það einungis tímaspursmál hvenær málið ratar á það borð.
Eðlilega er öllum sem að Sælukoti standa og koma brugðið vegna fréttarinnar, en áréttað skal fram að umræddur starfsmaður er til rannsóknar og með stöðu grunaðs manns; hann hefur ekki verið sakfelldur.
Leikskólinn Sælukot hefur verið starfræktur frá árinu 1978 og dagskrá hans byggir á nýhúmanískri hugmyndafræði, en leikskólinn er fræðsluverkefni Ananda Marga samtakanna (WWD), sem voru stofnuð 1955 af P.R.Sarkar – 1921-1990 – heimspekingi og kennara.
Starfsemin er margþætt; þetta er alþjóðleg stofnun ekki er rekin í hagnaðarskyni.
Umfangsmikið starf Ananda Marga endurspeglast í mörgum ólíkum greinum sem tileinkuð eru þróun mannkyns í gegnum menntun, hjálparstarf, velferð, listir, vistfræði, vitsmunalega endurreisn, frelsi kvenna og húmanískt hagkerfi.
Athugasemdir