Á Facebooksíðunni Brask og brall.is er kynlífsrúm auglýst til sölu fyrir lítið. Þegar betur er að gáð er þar um að ræða rautt og leðurklætt rúm úr kynlífsherberginu alræmda, sem hægt var að leigja í gegnum vefsíðuna sexroom.is.
Í fyrrasumar ræddi Mannlíf við eigandann, en hann var þá hæstánægður með viðtökurnar sem herbergið hafði fengið. Eitthvað virtist hægjast á eftirspurninni, því í nóvembermánuði síðasta árs var reksturinn auglýstur til sölu á tæpar 30 milljónir króna. Flest bendir til þess að ekki hafi tekist að selja reksturinn í heild, því nú er svo komið að rúmið góða úr herberginu er auglýst til sölu og sagt fara ódýrt. Sá sem auglýsir segist búinn að taka það niður, það sé ósamsett og að hann geti sjálfur flutt það heim til kaupanda. Að lokum óskar hann eftir tilboði, leggur áherslu á að rúmið fari ódýrt og að hann verði að losna við það sem fyrst. Ef marka má athugasemdakerfið undir auglýsingunni hefur hún vakið töluverða athygli og keppast hnyttnir Facebooknotendur við að merkja vini í athugasemdum sínum og benda þeim á gripinn.
Einn er hugsi og spyr: „Hver er þyngdin á þessu helvíti“, en það má reikna með því að sá sé með svefnherbergi sitt á efri hæð. Annar merkir félaga sinn og segir hann nú geta látið draum sinn um að breyta geymslunni í kynlífskjallara verða að veruleika. Enda er mikilvægt að elta draumana sína.
Athugasemdir