Nú má fara að búast við nýjum fréttum af máli Gylfa Þórs Sigurðssonar, en hann er laus gegn tryggingu í Bretlandi til 16. október.
Gylfi Þór er grunaður um kynferðisbrot gegn ólögráða einstaklingi og hefur verið undir rannsókn lögregluyfirvalda í Bretlandi síðan hann var handtekinn þann 16. júlí í Manchester.
Lögreglan í Manchester hefur hingað til ekki gefið nein svör um framvindu málsins. Hugsanlegt er að rannsókn málsins verði framlengd. Ef svo verður mun Gylfi Þór vera laus gegn tryggingu í lengri tíma. Hann má ekki yfirgefa England á meðan svo er.
Ef rannsókn málsins lýkur hinsvegar fyrir 16. október, má eiga von á því að þá komi í ljós hvort málið verði fellt niður eða ákæra gefin út á hendur Gylfa. Fari málið fyrir dómstóla er óvitað hve langan tíma það muni taka, en það gæti tekið marga mánuði, ef ekki lengri tíma.
Fyrstu fréttir af málinu voru á þá leið að leikmaður ensku úrvalsdeildarinnar hafi verið handtekinn grunaður um kynferðisbrot gegn barni. Mannlíf greindi fyrst íslenskra fjölmiðla frá því að maðurinn sem um ræddi væri Gylfi Þór.
Fram að því hafði hann ekki verið nafngreindur, hvorki þar ytra né hér heima, þó ýmsir samfélagsmiðlar hafi logað með vangaveltum og hvísli um að Gylfi væri sá sem um ræddi.
Gylfi Þór var fljótlega settur í leyfi hjá Everton og var ekki í leikmannahópi íslenska landsliðsins fyrir undankeppni HM 2022.
Hann dvaldi fyrst um sinn í öryggishúsnæði í Manchester og fréttir bárust af því að nánasta fjölskylda hans hefði ferðast til Bretlandseyja til að vera við hlið hans.
Alexandra Helga Ívarsdóttir, eiginkona Gylfa, sneri hinsvegar heim til Íslands með dóttur þeirra hjóna, sem fæddist í maí síðastliðnum.
Athugasemdir