„Hæ. Ég er í hálf­gerðu sjokki. Í fyrsta sinn var ég að lenda í því að það var dregið af kort­inu mínu rétt á meðan ég var að skoða vöru og athuga hver send­ing­ar­kostn­að­ur­inn væri.

Ég var ekki búin að stað­festa neitt hvað þá heim­il­is­fang, ég er með tvö. Svo þegar ég skoða á síð­unni, Amazon, þá er þessi vara ekki á lista yfir keyptar eða pant­aðar vörur.

Hefur eitt­hvert ykkar lent í svona og hvað get ég gert?“

Svo hljóðar færsla konu í Facebook-hópnum „Verslun á net­inu“.

Þetta virð­ist sann­ar­lega ekki vera eins­dæmi, en fleiri segja frá reynslu sinni af svip­uðum hlutum í athuga­semdum við færsl­una.

„Ég hef lent í þessu… var að skoða gervi­hársteygjur (hárið verður meira um sig) og ég var einmitt að gera það sama þ.e að ath. send­ing­ar­kostn­að­inn og svo bara allt í einu var ég búin að borga teygju­hel­vítin… kost­aði hingað komið rúmar 4.000 kr og sá sem allt veit veit að ég hef aldrei keypt svona teygjur. Mig lang­aði bara að vita hvað þær myndu kosta hingað komnar.

En ég taldi mig heppna þar sem ég fékk þessar tvær teygjur í mínum hár­lit loks er þær komu á klak­ann en ég var bara alls ekki búin að haka við „blonde“ áður en greiðsl­unni var rennt í gegn.

Ég gerði ekk­ert í þessu þar sem ég hélt að ég hefði gert ein­hver mis­tök,“ segir Inga nokkur.

Sigrún hefur sömu­leiðis lent í slíku atviki:

„Amazon gerði svipað hjá mér. Ætlaði að kaupa vöru en hætti við vegna send­ing­ar­kostn­að­ar­ins. Þeir ákváðu samt að taka út fyrir Amazon prime hjá mér þó ég hafi afhakað við það. Held ég muni mjög sjaldan versla við Amazon héðan í frá.“

„Þetta er still­ing­ar­at­riði á Amazon reikn­ingnum ykkar,“ segir Margrét. Það kemur nokkuð spánskt fyrir sjónir og verður að telj­ast ólík­legt að slík still­ing, að hægt sé að fram­kvæma greiðslu út af reikn­ingi án stað­festra kaupa og sam­þykkis korta­eig­anda, sé til staðar hjá fyr­ir­tæki á borð við Amazon.

„Ég lenti í þessu um dag­inn, ætl­aði að athuga hvað varan sem mig vant­aði myndi kosta með send­ingu, stað­festi aldrei neitt en fékk tölvu­póst um að ég væri búin að panta vör­una, canselleraði þessu og ekk­ert skuld­fært. Þetta er mjög slæmt en þitt mun verra, skuld­fært en ekk­ert í pöntun,“ segir Hafdís.

Andrés nokkur mælir með því að fara beina leið í bank­ann og fylla út eyðu­blað með athuga­semd um færsl­una.

„Loka kort­inu og tala við bank­ann,“ segir Sandra.

Dagbjört nokkur veltir því fyrir sér hvort fólk geymi korta­upp­lýs­ingar sínar á síðum sem þessum.

„Góður punktur. Ég taldi mig ekki gera það. En sem betur fer er ég með kortið mitt stillt þannig að ef það er notað án þess að fara í korta­les­ara þá fæ ég sms,“ segir Þóra, höf­undur upp­hafs­færsl­unnar.

Hulda nokkur seg­ist vista korta­upp­lýs­ingar sínar á síðum sem hún notar mikið, eins og Amazon. Hún tryggir öryggi sitt þó vand­lega á móti:

„Vera með góðar trygg­ingar á kort­unum, korta app þar sem þú getur læst kort­inu tíma­bundið ef þú ert ekki viss. Einungis vera skráð inn í einka­síma og einka­tölvu. Bregðast fljótt við ef þú færð til­kynn­ingu um útfærslu. Myndi aldrei nenna að vera með kortin út um allt.“

Hún heldur áfram:

„Maður lærir á þetta smá saman, mér finnst ég mjög örugg með þetta svona, ekki mikið hægt að gera þó svo að sím­anum væri stolið af mér. Allar upp­lýs­ingar þurfa alltaf ein­hverja stað­fest­ingu. Svo ef eitt­hvað er að fara út af kort­inu á Amazon.. af öllum stöðum, þá er bara ein­hver villa í kerf­inu en ekki um svik að ræða.“

Á heima­síðu Amazon er ekki bein­línis talað um vanda­mál af því tagi sem Þóra lýsir í upp­haf­s­pósti sínum. Ýmis önnur vanda­mál og villur varð­andi greiðslur eru til­teknar, en við­skipta­vinum er þó bent á að ef ekk­ert þeirra eigi við megi hafa sam­band við Amazon sím­leiðis og fá aðstoð.

Á vef­síðu Amazon segir sömu­leiðis að við­skipta­vinir séu ekki rukk­aðir fyrr en þeir velja „place your order“ (leggja inn pöntun) þegar komið er í „check out“, þar sem kaup eru stað­fest og útskrán­ing úr verslun fer fram. Raunar er það tekið fram að við­skipta­vinir Amazon séu ekki rukk­aðir um vör­urnar sem þeir kaupa fyrr en send­ing­ar­ferli hefst.

Hins­vegar, ef vör­urnar eru keyptar af þriðja aðila í gegnum Amazon, getur fyr­ir­tækið rukkað við­skipta­vini og dregið upp­hæð­ina af korti þeirra þegar þeir stað­festa kaupin.

Það virð­ist því vera full ástæða til að fylgj­ast vel með mis­tökum á borð við þau sem sagt er frá að ofan, þar sem slíkt á aug­ljós­lega ekki að geta gerst. Neyt­endum er bent á að fylgj­ast vel með yfir­liti sínu og hafa sam­band við við­skipta­banka sinn og þá net­verslun sem við á, ef þeir verða varir við dul­ar­fullar færslur.