Boðuð breyt­ing á gjald­skrá Strætó hefur farið fyrir brjóstið á mörgum neyt­endum. Hækkanir dynja á þeim sem síst skyldi, öldruðum og ung­mennum. Dæmi eru um hækk­anir upp á allt að 60 pró­sentum.

Til að mynda er vakin athygli á breyt­ing­unni í Facebook-hópnum „Vertu á verði – eft­ir­lit með verð­lagi“.

„Af hverju fá ekki aldr­aðir frítt?“ spyr þar Gunnar nokkur.

Fleiri tjá sig við upp­hafs­færsl­una og velta fyrir sér, líkt og Gunnar, hvers vegna ákveðnir hópar séu ekki farnir að ferð­ast frítt með strætó. Eru þar náms­menn nefndir, sem og börn.

Reyndar munu börn yngri en 11 ára ferð­ast frítt með strætó, en þarna er þó lík­lega átt við laga­lega skil­grein­ingu á börnum; ein­stak­linga undir 18 ára aldri.

„Það er búið að einka­vina­væða strætó­kerfið og laun þar keyrð niður í eins lág laun og hægt er að finna. Samt er þetta rekið með tapi. Sem sýnir bara enn og aftur að kapital­ismi er ekki að virka. En það er eins og það megi ekki við­ur­kenna það,“ segir Gunnar.

Anna bendir á að börn upp að 12 ára aldri fái frítt í strætó. Hildur nokkur svarar henni með eft­ir­far­andi hætti:

„Á móti þá hækka árskort ung­linga 12-17 úr 25.000 kr upp í 40.000 kr. Nemakort lækka niður í 40.000 kr. svo ung­lingur sem hefur fjár­hags­stuðn­ing til að stunda nám og svo áfram á full­orð­ins aldri í háskóla borgar áfram það sama og 12-17 ára barn/ung­lingur, eða 40.000 kr. Þeir sem detta úr fram­halds­námi 18 ára greiða 80.000 kr fyrir árskort. Það eru helst börn öryrkja og efna­minni sem þurfa að vinna frekar en stunda nám. Þegar barn verður full­orðið, 18 ára, þá hætta auð­vitað allir styrkir vegna barna en fyrir utan það þá drag­ast auka­lega af bót­unum heim­il­is­upp­bót sem er um 53.000 kr fyrir skatt og fram­færslu­upp­bót lækkar úr 52.000 kr niður í 38.000 kr fyrir skatt. Svo takk stjórn­endur strætó!!!“

Guðný telur gjald­skrána ekki hald­ast í hendur við mark­mið borg­ar­innar:

„Það er ekki skrítið að þeir séu hálf tómir á borgin ekki að vera græn og minnka bíla­notk­un­ina og nota strætó?“

Ásta tekur undir með Guðnýju.

„Þetta er fárán­legt! Þvílík hvatn­ing að minnka notkun einka­bíls­ins. Þetta þýðir bara að ég á eftir að skutla mínum börnum meira því ég hef ekki efni á strætó og bíl eftir þessa hækkun. Og að ekki sé lengur hægt að greiða með strætómiðum, hverju sætir það!? Ég á slatta af þessum miðum…..hvernig á ég þá að borga ef ég fer örsjaldan í strætó?“

Á hún þar við að gömlu strætómið­arnir munu falla úr gildi og ekki vera til sölu lengur. Á vef­síðu strætó segir hins­vegar:

„Frá og með 1. mars 2022, þá verður ekki lengur hægt að greiða með far­miðum um borð í Strætó á höf­uð­borg­ar­svæð­inu. Gefinn verður frestur til 16. mars 2022 til þess að skipta öllum gömlum far­miðum yfir í inn­eign í KLAPP greiðslu­kerf­inu.“

Neyt­endur sem eiga miða munu því geta fengið þeim breytt í inn­eign.

Breytingin er væntanleg þann 16. nóvember og í tilkynningu Strætó frá 2. nóvember segir:

„Samhliða inn­leið­ingu á nýja raf­ræna greiðslu­kerf­inu KLAPP, þann 16. nóv­em­ber 2021, þá verða einnig gerðar breyt­ingar á gjald­skrá Strætó. Markmið breyt­ing­ar­innar er fyrst og fremst að ein­falda gjald­skrána og gera öllum hópum kleift að kaupa mán­að­ar­kort á hag­stæðu verði.“

Breyt­ingin á almennum far­gjöldum er á þann veg að mán­að­ar­kort full­orð­inna lækkar í verði, úr 13.300 krónum niður í 8.000 krónur.

Hins­vegar mun til­boð í app­inu, þar sem þriðji hver mán­uður er frír, ekki lengur vera í boði. Engin breyt­ing verður á árskorti, sem fæst á 80.000 krónur, eða stöku far­gjaldi, sem enn verður á 490 krónur.

Börn yngri en 11 ára ferð­ast frítt með strætó.

Töluverð breyt­ing verður gerð á gjald­skrá bæði ung­menna 12-17 ára og eldri borg­ara, 67 ára og eldri.

Í til­felli beggja þess­ara hópa heldur stakt far­gjald sama verð­miða, 245 krónur. Í fyrsta sinn munu hóp­arnir geta keypt stakan mánuð og mun hann kosta 4.000 krónur. Hins­vegar hækkar verð árskorts úr 25.000 krónum upp í 40.000 krónur. Það gerir hækkun upp á 60 pró­sent.

Breyt­ingar í til­felli öryrkja eru allar í formi lækk­ana eða fleiri mögu­leika í kaupum. Þannig lækkar stakt far­gjald úr 245 krónum niður í 170 krónur, stakur mán­uður verður nú í boði á 2.400 krónur og árskort lækkar lít­il­lega, úr 25.000 krónum í 24.000 krónur.

Nemar 18 ára og eldri munu fá dálítið meira fyrir snúð sinn, en á meðan stakt far­gjald helst óbreytt mun verð á árskorti lækka úr 54.500 krónum niður í 40.000 krónur. Það gerir verð­lækkun um tæp­lega 27 pró­sent. Einnig verður hægt að kaupa stakan mánuð á 4.000 krónur.