Jafnréttisstofa hlaut á dögunum 60.000€ styrk jafnvirði rúmlega 9 milljónum íslenskra króna á núverandi gengi úr Erasmus+ á sviði mennta- æskulýðs- og íþróttamála í flokki samstarfsverkefna.
Verkefnið sem er styrkt er unnið í samstarfi við Inova Aspire í Hollandi og kallast “Diversity Inside Out – Voices from Inside Organisations Foster Change“.
Hjalti Ómar Ágústsson, sérfræðingur á Jafnréttisstofu, tók við styrknum á Kjarvalsstöðum og er áætlað að verkefnið hefjist 1. desember 2021 og ljúki í júní 2023.
Jafnréttisstofa hefur frá árinu 2018 haft umsjón og eftirlit með framkvæmd laga um jafna meðferð óháð kynþætti og þjóðernisuppruna, og lögum um jafna meðferð á vinnumarkaði.
Samkvæmt Jafnréttisstofu er verkefnið liður í að veita fræðslu og efla þekkingu og getu stofnunarinnar til að sinna skyldum sínum.
Jafnréttisstofa útskýrir að með verkefninu verður lögð áhersla á mikilvægi fjölbreytileika á vinnumarkaði og hvernig stjórnendur, mannauðsstjórar, starfsfólk og ráðgjafar innan fyrirtækja, stofnana og félaga, geta virkjað fjölbreytileika innan skipulagsheilda starfseminni í hag.
Litið verður til mismunandi áhrifa Covid-19 og aukinnar fjarvinnu á vinnuveitendur og starfsfólk og hvernig koma má í veg fyrir neikvæð áhrif á fjölbreytileika og framgang mismunandi hópa í starfi.
Athugasemdir