Jón Steinar Gunnlaugsson, lögmaður og fyrrverandi hæstaréttardómari, er sannfærður um að nauðgunum og öðrum kynferðisbrotum muni snarfækka séu konur varaðar við áfengis- og vímuefnanotkun og þeim kennt að gæta sín sjálfar. Honum þykir miður að ekki megi ræða þessa hlið kynferðisbrotamála án þess að umræðan þyki réttlæting á brotum misindismanna.
Jón Steinar fer yfir skoðun sína í aðsendri grein í Morgunblaðinu. Þar fullyrðir hann að áfengis- og vímuefnanotkun, oftast kvenna, sé ráðandi áhrifaþáttur í langflestum kynferðisbrota.
„Þó að enginn vafi sé á, að þessi neysla sé stærsti áhrifaþátturinn í bölinu, heyrast þær skoðanir að á þetta megi helst ekki minnast. Sumir hafa gengið svo langt að telja óheimilt að vara þá við sem verða þolendur svona brota með því að benda þeim á að varast notkun vímuefna í því skyni að forðast brot,“ segir Jón Steinar og heldur áfram:
„Ég tel að áfengis- og vímuefnanotkun sé ráðandi áhrifaþáttur í langflestum þessara brota.
Afleiðingar hennar geta auk nauðgana og annarra ofbeldisbrota verið ótímabærar þunganir,
vanræksla og jafnvel misnotkun barna, fóstureyðingar, forsjársviptingar, skaðleg andleg áhrif á börn, framhjáhöld, slys og ótímabær andlát.“
Jón Steinar virðist ekki vera hrifinn af því að verið sé að nafngreina menn á opinberum vettvangi, án þess að sakir séu sannaðar sem kosti þá jafnvel vinnu og útskúfun frá samfélaginu. Hann skilur ekki hvers vegna megi ekki vara konur við vímuefnanotkun á skemmtistöðum.
„Þetta er auðvitað hálfgerður þvættingur, sem á líklega rót sína að rekja til þess að svo margir vilja geta þjónað áfengisnautn sinni í friði. Í raun er verið að segja að ekki megi benda fólki á að reyna að gæta sín sjálft. Það er samt vafalaust besta vörnin gegn svona brotum að gæta sín sjálfur. Ráðið er sem sagt að hætta eða draga verulega úr notkun áfengis- og vímuefna hvort sem er á skemmtistöðum eða bara heima fyrir. Þeir sem ekki geta nýtt sér þetta ráð eru líklega háðir vímugjöfunum með þeim hætti að þeir ættu að leita sér hjálpar.“
Athugasemdir