Falin myndavél sýnir viðurstyggilega meðferð á fylfullum merum í íslenska blóðameraiðnaðinum. Heimildarmynd um málið frumsýnd á mánudaginn.
Á mánudaginn næsta verður heimildarmynd þýsk/austurrísku dýraverndarsamtakanna TSB Tierschutzbund Zurich frumsýnd og verður hún þá öllum sýnileg á YouTube.com. Fjallar hún um íslenska blóðmeraiðnaðinn. Hefur myndin verið í vinnslu síðustu 18 mánuði en myndefni sem þar er að finna var tekið á þessu hausti en notast var við faldar myndavélar.
Blóðmeraiðnaðurinn gengur út á það að hirða allt að 40 lítra af blóði úr fylfullum merum og merum með folöld á 10 vikum frá sumri fram á haust til að vinna hormónið PMSG úr blóðinu. Hormónið er selt áfram til svínakjötframleiðenda til að auka frjósemi í svínaeldi.
Vegna hrottalegrar meðferðar meranna hefur Evrópuþingið ályktað til Evrópska ráðsins að framleiðsla og notkun PMSG verði bönnuð í Evrópu. Ísland er eitt fárra landa sem heimila þetta.
Sjá má á upptökum földu myndavélanna að hafið er yfir allan vafa að meðferð meranna á Íslandi stangast algerlega á við meginreglur laga um velferð dýra.
Þar má sjá að merarnar eru bundnar fastar í mjög litlu rými á meðan starfsmenn þrýsta á þær með viðarplanka og berja með prikum og slá utanundir með lófanum. Má greinilega sjá að merunum líður miklar kvalir af þessum völdum og að þær upplifi mikla hræðslu á meðan á þessari blóðúrtöku stendur.
Hér fyrir neðan má sjá stiklu úr heimildarmyndinni en eru lesendur sterklega varaðir við myndefninu.
Athugasemdir