Lúðvík: „Hélt ég hefði orðið meistari en formaður Tjaldfélags Hafnarfjarðar er að eyðileggja það“

Jón Rúnar Hall­dórs­son fyrrum for­maður knatt­spyrnu­deildar Fim­leika­fé­lags Hafn­ar­fjarðar vakti mikla athygli á Stöð2 Sport um liðna helgi; þar gerði hann upp magn­aða tíma félags­ins á árunum 2004 til 2016.

Eitt af því sem Jón Rúnar tal­aði um var hreinn úrslita­leikur FH og Stjörn­unnar í októ­ber árið 2014:

„Allir sann­gjarnir menn vita hvernig þetta hefði endað ef allt hefði verið spilað eftir regl­unum sem á að fara. Hefðum við ekki verið með blindan beitu­sala hérna á lín­unni, þá hefði þetta farið allt öðru­vísi. Ég held að Garð­bæ­ingar margir hverjir viti það sjálfir að þeir eigi eftir að vinna Íslands­meist­ara­tit­il­inn. Ég segi þetta ekki til að gera mér ein­hverja hug­arró. Það er bara þannig í þessum leik að allir vilja gera hlut­ina eftir regl­unum,“ sagði Jón Rúnar.

Hvað sem öðru líður getur eng­inn lengur fett fingur út í það að Stjarnan varð raun­veru­lega  Íslands­meist­ari í fyrsta sinn árið 2014: FH klúðr­aði hverju dauða­fær­inu á eftir öðru og ekki hægt að kenna Stjörnu­mönnum um það; þeir áttu tit­il­inn fylli­lega skilið.

Ummæli Jóns Rúnars um leik­inn fræga hafa farið öfugt ofan í margan stjörnu­mann­inn – og sá ákveðni mynd­ar­piltur Lúðvík Jónasson lagði orð í belg um leik­inn fræga eftir ummæli Jóns Rúnars:

„Ég varð fer­tugur þessa helg­ina, ég hélt að ég hefði orðið Íslands­meist­ari. Formaður Tjald­fé­lags Hafn­ar­fjarðar er að eyði­leggja það. Þeir eru búnir að taka átta dollur eftir bók­inni og regl­unum,“ sagði Lúlli fyrrum leik­maður Stjörn­unnar í hlað­varps­þætt­inum Dr. Football:

„Hvað veit Jón Rúnar um það, hefði hann (Sigurður Óli Þor­leifs­son) flaggað rang­stöðu á Óla Kalla hvernig þessi leikur hefði þró­ast. Þeir geta ekki grátið yfir vít­inu, ég held að Jón Rúnar sé nú ekki bestur til að ræða reglur. Hann brýtur reglur á hverjum ein­asta leik, fékk sekt í Evr­ópu­keppni þegar hann labb­aði inn á völl­inn. Hann er kóng­ur­inn í Krikanum en ekki tala um reglu­verki.“

Hins vegar eru ekki illindi hjá Lúðvík gagn­vart Jóni Rúnari:

„Hann er snill­ingur, ég er hrifin af karakt­erum eins og honum. Hann vill bara vinna og til í að gera allt til þess. Það er rán­dýrt að búa í Mónakó (Garðabæ), þetta er ekki Sam­fylk­ingar bæj­ar­fé­lag. Við erum eina liði í tólf liða deild sem hefur farið tap­laust í gegnum tíma­bilið,“ sagði hann.

Hjörvar Haf­liða­son stjórn­andi þátt­ar­ins bað Lúlla um að útskýr hvers vegna hann tal­aði um Tjald­fé­lagið:

„Þetta eru bara tjöld þarna, hvít tjöld út um allt. Þetta er eins og á Þjóð­há­tíð,“ sagði Lúðvík og var þá að tala um knatt­spyrnu­hús fim­leika­fé­lags­ins.