Þórólfur Guðnason sótt­varna­læknir seg­ist halda að enn fleiri hafi greinst með kór­óna­veiruna í gær en í fyrra­dag. Tæplega 500 manns hefur greinst á dag síð­ustu daga.

„Mér sýn­ist að jafn­vel fleiri hafi greinst í gær, svona fljótt á litið,“ segir Þórólfur í við­tali í Bítinu á Bylgj­unni í morgun.

Segir Þórólfur að mik­ill fjöldi manns hafi farið í sýna­töku und­an­farna daga, en aðeins rétt um þrjá­tíu pró­sent þeirra sem greinst hafi með veiruna hafi verið í sótt­kví; því sé það aug­ljóst að veiran sé búin að dreifa sér vítt og breitt í sam­fé­lag­inu.

Þórólfur var spurður að því hvort hið nýja afbrigði, Ómíkrón, sé komið og sé að „valta yfir þjóð­ina á svip­stundu.“

Þórólfur játti því:

„Það er bara þannig enda hefur það sýnt sig í útreikn­ingum hjá okkur og Íslenskri erfða­grein­ingu á grein­ingu smita að tvö­föld­un­ar­hrað­inn er ein­ungis tveir dagar. Það er miklu hrað­ari útbreiðsla en við sáum með Delta-afbrigðið.“

Aðspurður um hug­myndir um að Ómíkrónaf­brigðið geti leitt til hjarð­ó­næmis segir Þórólfur það vel geta gerst:

„Jú, við höfum alltaf verið að tala um það, og ég hef talað um það frá byrjun, að það séu bara þrjár leiðir til að fá þetta hjarð­ó­næmi. Við losnum ekki við veiruna nema með hjarð­ó­næmi. Það ger­ist annað hvort með nátt­úru­legri sýk­ingu; með bólu­setn­ingu – en núver­andi bólu­efni sem við erum með virð­ist ekki alveg duga í það, og svo getur það gerst með sam­blandi af þessu tvennu; ef flestir eru bólu­settir til að koma í veg fyrir alvar­legar afleið­ingar af veik­inni, þá getum við miklu frekar látið veik­ina, pest­ina, ganga yfir án þess að fá alvar­legar afleið­ingar. Það er það sem málið snýst um; að fá ekki of marga alvar­lega veika á sama tíma þannig að heil­brigð­is­kerfið okkar ráði ekki við það.“

Hér má hlusta á við­talið í heild sinni: