Upp úr klukkan hálf eitt í nótt var tilkynnt um líkamsárás í miðborg Reykjavíkur. Var málsatvikum lýst þannig að maður hefði hrint stúlku þannig að hún hrasaði aftur fyrir sig og lenti á bakinu. Einnig var tilkynnt um mann sem hafði verið kýldur í andlitið. Þegar lögregla kom á vettvang var árásaraðilinn á bak og burt. Skömmu síðar hafði lögregla upp á manninum og var frásögn hans með öðru sniði. Hann var með áverka og samkvæmt lögreglu hafði hann mögulega farið úr axlarlið. Maðurinn var fluttur með sjúkrabíl á slysadeild Landspítala til aðhlynningar og er málið í rannsókn.
Lögregla þurfti að hafa afskipti af fleira fólki í miðbænum í nótt. Laust eftir miðnætti voru tveir ölvaðir menn handteknir fyrir brot á lögreglusamþykkt, en þeir höfðu verið að slást og veitast að vegfarendum. Sökum annarlegs ástands voru mennirnir vistaðir í fangageymslum lögreglu í nótt. Lögregla hafði síðan afskipti af manni sem grunaður var um brot á lögreglusamþykkt Reykjavíkurborgar; að kasta af sér vatni á Lækjartorgi. Maðurinn játaði brotið.
Í gær varð umferðarslys við verslanir í Garðabæ. Þar hafði bifreið verið ekið á gangandi konu. Eftir slysið hafði ökumaður sagst ætla að setja bifreiðina í stæði og athuga með skemmdir en flúði þá af vettvangi. Konan fann til eymsla í mjöðm og var því flutt með sjúkrabíl til aðhlynningar á bráðadeild. Lögregla hefur upplýsingar um bifreið gerandans og er málið í rannsókn.
Bíll valt í Kórahverfi í Kópavogi. Ökumaður hafði misst stjórn á bifreið sinni í hálku með þeim afleiðingum að hún valt á hliðina. Engin slys urðu á fólki og var bifreiðin flutt af vettvangi.
Tilkynnt var um annað umferðarslys laust fyrir klukkan þrjú í nótt á mótum Sæbrautar og Kringlumýrarbrautar. Þar hafði bifreið verið ekið á ljósastaur. Ökumaður fann til eymsla í síðu og var því fluttur til aðhlynningar á bráðadeild Landspítala. Bifreiðin var flutt af vettvangi og Orkuveitu tilkynnt um ljósastaurinn.
Athugasemdir