„Í starfi mínu fæ ég að heyra sögur úr Hinni Reykjavík. Í Hinni Reykjavík ríkir ekkert góðæri, heldur húsnæðisóöryggi, fátækt og basl. Líkt og það að leigja fyrir 250 þúsund krónur á mánuði. Á fjórum mánuðum gerir það EINA MILLJÓN. Svona er veruleikinn og honum þarf að breyta,“ segir Sanna Magdalena Mörtudóttir, borgarfulltrúi Sósíalistaflokksins og stjórnandi þáttarins Hin Reykjavík.
Sanna fékk til sín Anítu Da Silva Björnsdóttur en hún var í 12 ár á biðlista fyrir félagslegu húsnæði. Þeir sem bíða eftir félagslegu húsnæði þurfa að endurnýja umsókn sína á ársfresti en Aníta segist að lokum hafa gefist upp, 530 manns eru nú á biðlista.
Aníta er öryrki og því ekki í stéttarfélagi, hún hefur ekki kost á að leigja í gegnum leigufélög og er því föst á hinum almenna leigumarkaði. Hún borgar nú um 250 þúsund krónur á mánuði, á fjórum mánuðum borgar hún því milljón í húsaleigu.
Aníta, eins og margir aðrir, kemst ekki í gegnum greiðslumat fyrir húsnæðisláni. Hún fordæmir ríkisstjórnina fyrir að leggja ekki meiri áherslu á leigumarkaðinn, þær íbúðir sem byggðar eru henti ekki þeim sem eru í mestu neyðinni. „Það er ekkert verið að byggja fyrir öryrkja, láglaunafólk eða einstæða foreldra.“
Athugasemdir